Keıingi 5 jylda búdjet shyǵyny kirisinen 2 ese asyp ketti. 2023-2025 jyldarǵa arnalǵan respýblıkalyq búdjet naqtylanyp jatqan Senat otyrysynda spıker Máýlen Áshimbaev osyndaı pikir bildirdi, -dep habarlaıdy Almaty-akshamy.kz QazAqparat-qa silteme jasap.
«Bir ǵana sandy keltireıin. Keıingi bes jylda respýblıkalyq búdjettiń munaıdan tys kirisi 66 paıyz ósken. Bir qarasań, 5 jyldyń dınamıkasy jaqsy sıaqty. Al shyǵys dál osy kezeńde 120 paıyz artqan. Iaǵnı, bizde respýblıkalyq búdjettiń shyǵysy kiristen eki ese alda keledi. Osyǵan baılanysty Úkimettiń qajetti aqshany ne ulttyq qordan, ne búdjet tapshylyǵyn ulǵaıtý arqyly alyp otyrǵany túsinikti. Bul búdjet jobasynda tapshylyq burynǵy mólsherde qalǵanyn kórip otyrmyz. Iaǵnı, sáıkesinshe ulttyq qordan alyp otyrmyz», - dedi Máýlen Áshimbaev.
Onyń paıymynsha, Úkimette budan basqa jol da joq.
«Biraq odan basqa kóz joq bolyp tur ǵoı. Nemese salyq bazasyn ulǵaıtý kerek. Sonda negizgi messedj – bárimizge qarjylyq tártipke kelý kerek. Ulttyq qor qarajatyn tek strategıalyq shyǵyndarǵa ǵana jumsaýymyz kerek jáne qordyń aktıvin arttyrýdyń shynaıy strategıasy qolymyzda bolýy qajet. Jyl saıyn 4 trln teńgeden alsaq (Ultttyq qordan – red.), ony qalaı ulǵaıtamyz? Depýtattar ulttyq qordyń qarajatyn paıdalaný strategıasyn emes, aktıvin arttyrý strategıasyn kórgisi keledi», - dedi Senat spıkeri.