Almatyda óz-ózine qol jumsamaq bolǵan er adamdy qutqaryp qalǵan patrúldik polısıa qyzmetkerleri marapattaldy.
Kásibı sheberlikteri, sondaı-aq azamattardyń qaýipsizdigi men quqyq tártibi jolynda janqıarlyq qyzmeti úshin Almaty qalasy PD jergilikti polısıa qyzmeti patrúldik polısıa polkiniń ınspektorlary Qudaıbergen Toǵjanov pen Sanjar Ábdiraıymov “Qazaqstan polısıasyna 30 jyl” mereıtoılyq tósbelgisimen marapattaldy, dep habarlaıdy Almaty-akshamy.kz Polisia.kz-ke silteme jasap.
Erjúrek polısıa qyzmetkerlerine marapatty Almaty qalalyq polısıa departamentiniń bastyǵy Arystanǵanı Zapparov tabys etti. Marapattaý rásimi saltanatty jaǵdaıda ótti.
Eske salaıyq, jaqynda “Býran-317” ekıpajynyń patrúldik polıseıleri óz-ózine qol jumsamaq bolǵan almatylyq azamatty aman alyp qalǵan bolatyn. Tártip saqshylary oqıǵaǵa qatysy bar adamnyń da, jol qozǵalysynyń basqa qatysýshylarynyń da qaýipsizdigin qamtamasyz etý sharalaryn qabyldady.
«Saǵat 19:00 shamasynda bizge Súıinbaı dańǵylynyń boıyndaǵy jaıaý júrginshiler kópirinen belgisiz er adam sekirgisi keletini týraly qońyraý kelip tústi. Biz oqıǵa ornyna úsh mınýtta jettik. Áriptesimmen birge er adamdy mundaı áreketke barmaýǵa kóndire bastadyq», – dedi JPQB patrúldik polısıa polkiniń qyzmetkeri Toǵjanov Qudaıbergen.«Ol bizden alystaı berdi, ózin jónsiz ustady. Suraqtarymyzǵa jaýap bermedi. Biz onyń nazaryn aýdaryp, sóılesip, ony qorshaýdyń arǵy jaǵynan shyǵarý úshin jaılap jaqyndadyq. Sol kezde bizdiń basqa áriptesterimiz tómende, joldyń boıynda bolyp, jol qaýipsizdigin qamtamasyz etti. Olar er adam sekirip ketken jaǵdaıda aýyr jaraqat almas úshin júk kóligin kópirdiń astyna ákelip qoıdy. Bir kezde biz ony ustap úlgerdik. Ortaq kúsh-jigerdiń arqasynda ony qaýipsiz jerge alyp shyqtyq», – dedi Sanjar Ábdiraıymov.