Bul jolda Eýropanyń ozyq tájirıbesin úlgi etilmek.
Qazirdiń ózinde qajetti jabdyqtardy alý boıynsha kelisimder bastaldy, dep habarlaıdy Almaty-akshamy.kz 24.kz-ke silteme jasap.
Áýejaı talaı kezdesý men qoshtasýdyń kýási. Mundaǵy árbir jandy qýanysh, tolqynys, keıde birtúrli ókinish bıleıdi. Tátti sezimderdi barynsha seziný úshin asyǵyp-aptyǵýdyń qajeti shamaly. Áttegen-aıy, kóbine jolaýshy mádenıeti umytylyp, shydamsyzdyqqa boı aldyryp jatamyz. Ásirese tekserý oryndarynda.
«Tekserý qyzmetinen tekserýden ótken kezde kóp jolaýshylar aıtady, bizdiń aıaq kıimimizdi ne úshin tekseredi? Bizde qaýlyda jazylǵan, búkil jolaýshylar ótken ár reıske 10%-ten artyǵyn biz qolmen tekserýimiz kerek. Randomchek deıdi aǵylshynsha, qazaqsha kezdeısoq sıfrmen belgilenedi. Sondaı adam belgilengende, bizdiń jumysshylar onyń denesin qolmen tekseredi. Aıaq kıimin suraıdy. Qondyrǵy arqyly tekseredi. Qol júgin de qolmen tekseredi.», - deıdi áýejaıdaǵy tekserý qyzmeti bólimshesiniń bastyǵy Ǵabıt Súleev.
Elorda áýejaıyndaǵy tekserý beketinen kúnine 5000-nan asa jolaýshy ótedi. Elimizdiń avıasıalyq ákimshiligi olardyń sany arta bererine senimdi. Osy oraıda respýblıkadaǵy barlyq áýejaıda memlekettik biryńǵaı avıasıalyq qaýipsizdik uıymyn qurý kózdeledi.
«Eýropa standart 4, standart 5-ke kóship jatyr. Olardyń tehnıkalyq jabdyqtary «bodıskanerler» dep atalady. Bizdiń áýejaılarda osy bodıskanerler tek Astanada qoldanylady. Endi aqyryndap 2027 jylǵa deıin osy tehnıkalyq jabdyqtardy búkil Qazaqstannyń aeroporttarynda qamtamasyz etiledi», - «Qazaqstan avıasıalyq ákimshiligi» AQ Avıasıalyq qaýipsizdik departamentiniń dırektory Darhan Qatyshev.
Kemedeginiń jany bir. Endeshe qaýipsizdik basty orynda. Ázirge jolaýshylardy tekserý áýejaı qyzmetshileriniń moınynda. Eýropada bul mindetti biryńǵaı operator atqarady. Sol arqyly áýejaılardyń antıterrorlyq deńgeıi kóterilgen. Munyń mańyzy zor. Ókinishke qaraı, tyıym salynǵan zattardy tasyp, «qol júgimde jarylǵysh zat bar» dep jalǵan shý shyǵaratyn qıqar jolaýshylar da kezdesedi.
«Tekseris pýnktinde turǵan mamandardyń óziniń qaǵıdalary bar, sol qaǵıdalary negizinde ázil retinde «meniń qoljúgimdi bomba bar» dep aıtylǵan sózder orynsyz. Sol mamandar óz qaǵıdalaryna sáıkes óz sharalaryn qoldaıdy. Keıbir jolaýshylar polısıa pýnktine tapsyrady. Keıbir jolaýshylardy reısten sheshýi múmkin. Al biryńǵaı operatordy alǵashqy jyldary memleket qarjylandyrady. Keıingi shyǵyndar avıasıalyq alym esebinen óteledi. Bul bılet baǵasyna esh áser etpeıdi. Aıtpaqshy, keleshekte Qazaqstan men AQSH arasynda tikeleı reıster ashylýy múmkin», - deıdi «Qazaqstan avıasıalyq ákimshiligi» AQ Avıasıalyq qaýipsizdik departamentiniń dırektory Darhan Qatyshev.
Elimizdiń geografıalyq aıasy keńeıe beredi. Memlekettik biryńǵaı avıasıalyq qaýipsizdik uıymy bul múmkindikti eseleı túsetini sózsiz.
Tirkeýden ótý úshin áýejaıǵa erterek kelý kerek. Asyqqanda uzaqqa sozylatyndaı kórinetin tekserý jumystary siz ben bizdiń saqtyǵymyz úshin ekenin esten shyǵarmaǵan jón.