Almaty Polytechnic College-de sıfrlyq qaýipsizdikke arnalǵan estafeta ótti, dep habarlaıdy aqshamnews.kz.
Internet - búginde tek aqparat kózi ǵana emes, adamdar arasyndaǵy qarym-qatynastyń qýatty quralyna aınaldy. Sondyqtan balalardy bul keńistikte qaýipsiz, sanaly ári jaýapty qoldanýǵa úıretý óte mańyzdy. Osy maqsatta qolǵa alynǵan "Kıber Tumar" aqparattyq-bilim berý naýqany balalardyń sıfrlyq qaýipsizdigin arttyryp, ata-analardyń bala tárbıesinde onlaın aqparatpen jumys isteý mádenıetin qalyptastyrýǵa yqpal etedi. Bul bastama - búgingi zamanaýı qaýipterge beriletin ózekti ári qajet jaýap.
2025 jylǵy 28 mamyrda Almaty Polytechnic College bazasynda "Qazaqstan balalary" respýblıkalyq aksıasy jáne Almaty qalalyq bilim basqarmasynyń jospary aıasynda "Sıfrlyq mamandyqtar qalasy" atty mazmundy oıyn-estafeta uıymdastyryldy.
İs-sharanyń maqsaty — oqýshylardy zamanaýı sıfrlyq mamandyqtarmen tanystyrý, ınternettegi qaýip-qaterlerden qorǵaný joldaryn úıretý jáne kıberqaýipsizdik daǵdylaryn damytý.
Shara barysynda qatysýshylar sıfrlyq álemge saıahat jasap, ınternet qaýipteri men qorǵaný erejelerin meńgerdi. Tipti óz kıberqaharmandaryn beınelep, túrli ıntellektýaldyq jáne praktıkalyq tapsyrmalardy oryndady.
Estafetaǵa Almaty qalasy men Qarasaı aýdanyndaǵy mektepterden 30-dan astam bala qatysty.
Oqýshylar úsh komandaǵa bólinip, vırtýaldy Kıberqalany shabýyldan qorǵaýǵa tyrysty. Olar "Kıberqalqan", "Internet gvardıasy" jáne "Vırtýaldy saqshylar" degen komandalarǵa toptasty.
Estafeta qorytyndysy boıynsha «Internet gvardıasy» komandasy jeńimpaz atanyp, Kıberqalanyń kıberqaharmany mártebesine ıe boldy. Arnaıy kýbok Almaty servıs jáne tehnologıalar kolejine tabystaldy.
Barlyq qatysýshylarǵa "Internettiń jas qorǵaýshysy" belgisheleri men estelik syılyqtar tabystaldy.
Sıfrlyq álem — bolashaqtyń keńistigi. Al ony qorǵaýshylar — bilimdi, batyl ári jaýapty jas urpaq!