Qazaqstan halqynyń 15% kedeı sanatynda
Qazaqstanda kedeılikti ólsheýdiń kópólshemdi modelin engizip, ataýly áleýmettik kómekti jetildirý qajet. Bul týraly Májilis depýtaty, Áleýmettik-mádenı damý komıtetiniń tóraǵasy Jámılá Nurmanbetova aıtty, dep habarlaıdy Almaty-akshamy.kz QazAqparatqa silteme jasap.
«Biz áli de kedeılikti jeńe almaı kelemiz. Dúnıejúzilik banktiń baǵalaýynsha, Qazaqstan azamattarynyń 15%-y kedeı sanatynda. Oǵan qosa, resmı statısıka halyqtyń 5,1%-y kúnkóris deńgeıinen tómen tabyspen ómir súretinin kórsetedi», - dedi Jámılá Nurmanbetova Áleýmettik kodeks jobasy týraly Úkimet saǵatynda.
Bul rette Eńbek jáne halyqty áleýmettik qorǵaý mınıstrligi Otbasynyń sıfrlyq kartasyn usynyp, óz jaǵdaıyn «qıyn» dep sanaıtyn otbasylar úlesi shamamen 15% quraıtynyn kórsetken.
«Mundaı qarama-qaıshy derekter memleket qoldaýyn qajet etetinderdiń naqty sanyn anyqtaýǵa múmkindik bermeıdi. Kedeılik shegindegi azamattardy áleýmettik qoldaý sharalarynyń biri – ataýly áleýmettik kómek. Ókinishke oraı, Áleýmettik kodeks jobasynda kórsetilgen usynys asa ózgere qoımaǵan. Sońǵy jyldary kóptegen elder kedeılik deńgeıin anyqtaýda kedeılikti ólsheýdiń kópólshemdi modelderin qoldanýǵa tyrysýda, ıaǵnı, azamattardyń densaýlyq saqtaý, bilim berý qyzmetterine qoljetimdiligi, jeke turǵyn úıi jáne turaqty tabysy qaralady. Sondyqtan mınıstrlikke kedeılikti ólsheýdiń kópólshemdi modelin eskerip, ataýly áleýmettik kómekti jetildirýdi jalǵastyrý qajet dep sanaımyz», - dedi J. Nurmanbetova.
Spıker, eń bastysy, árbir muqtaj otbasy tıisti memlekettik organdardyń nazarynda bolýy ekenin aıtty.
«Ol úshin ár otbasymen jeke jumys isteý qajet. Bul sıfrlyq karta derekteri boıynsha 1,2 mln otbasy», - dedi Májilis depýtaty.