Eńbek jáne halyqty áleýmettik qorǵaý mınıstri Tamara Dúısenova jazataıym oqıǵalarǵa qatysty jumys berýshiler úshin saqtandyrý tarıfterin tómendetý josparlary týraly aıtty dep habarlaıdy Almaty-akshamy.kz. QazAqparatqa silteme jasap.
«Budan basqa, qyzmetkerlerdi jazataıym oqıǵalardan saqtandyrýdy júzege asyratyn jumys berýshiler úshin saqtandyrý tarıfterin tómendetý kózdelgen. Stavkalar eń tómengi jáne eń joǵary mánderge ıe bolyp, bul mánderdi tańdaý óndiristegi jazataıym oqıǵalardyń, jaraqattanýdyń jáne kásiptik aýrýlardyń deńgeıine baılanysty bolady», - dep túsindirdi Tamara Dúısenova Úkimet saǵaty barysynda.
Onyń aıtýynsha, stavkalardy tómendetý boıynsha qabyldanyp jatqan sharalar memlekettik áleýmettik saqtandyrý qorynan jáne saqtandyrý kompanıalarynan tólenetin áleýmettik tólemder mólsherin kezeń-kezeńimen arttyrýmen qatar júzege asyrylady.
«Kelesi jyldan bastap jumysynan aıyrylǵan azamattarǵa jarnalardy tóleý kezeńine sáıkes, MÁSQ-dan 6 aıǵa deıingi burynǵy tabysynyń 45% mólsherinde tólemder qarastyrylǵan», - dep túıindedi Tamara Dúısenova.