Memlekettik qoldaý arta túspek.
Búgin Májilistegi Úkimet saǵatynda QR Eńbek jáne halyqty áleýmettik qorǵaý mınıstri Tamara Dúısenova QR Áleýmettik kodeksi jobasyna engiziletin jańa parametrler otbasylarǵa beriletin memlekettik qoldaýdy keńeıtetinin aıtty, dep habarlaıdy Almaty-akshamy.kz QazAqparatqa silteme jasap.
«Kodeks otbasy múshelerin áleýmettik qoldaýǵa baǵyttalyp otyr. Sıfrlyq kartany qanatqaqty joba retinde iske asyrý barysynda kóp balaly otbasylardyń áleýmettik qaterlerge tap bolý yqtımaly joǵary ekenin kórdik. Osy oraıda Áleýmettik kodeksi jobasynda balaly otbasylardy áleýmettik qoldaýdyń qoldanystaǵy birtutas júıesin tolyq saqtaý jáne onyń negizgi parametrlerin ózgertý qarastyryldy. Naqtylaı keteıin, búgingi balaly otbasylardy qoldaý júıesi halyqaralyq standarǵa sáıkes júktilik jáne bosaný, bala týý, bala kútimine baılanysty tólemderdi, kóp balaly analar jáne múgediktigi bar balaly otbasylarǵa qarasty tólemderdi jáne tabysy az otbasylarǵa beriletin ataýly áleýmettik kómekterdi qamtıdy», - dedi T. Dúısenova.
Onyń aıtýynsha, Kodeks jobasyna engiziletin jańa parametrler otbasylarǵa beriletin memlekettik qoldaýdy keńeıtedi.
«Memleket basshysynyń tapsyrmasy boıynsha, 18 jasqa deıingi balalarǵa beriletin Ulttyq qordyń ınvestısıalyq kirisinen túsken tabystyń 50 paıyzy kólemindegi bastapqy kapıtal qosymsha kómek kózi bolmaq. Bala kútimine baılanysty tólemder merzimi uzartylatyn bolady. Kóp balaly analarǵa beriletin járdemaqy mólsheri ósedi jáne olar «Altyn alqa» jáne «Kúmis alqamen» nagradttalǵan analar degen jańa statýspen qarastyrylatyn bolady. Taǵy bir mańyzdy parametr – 2025 jyldan bastap ataýly áleýmettik kómek taǵaıyndaý úshin kedeılik shegi búgingi kúnkóris deńgeıinen emes, medıandyq tabys esebinen anyqtalatyn bolady. Bul rette Ekonomıkalyq yntymaqtastyq jáne damý uıymy elderiniń tájirıbesi zerdelendi. Atap aıtqanda, 8-den astam el osy kórsetkishti paıdalanady jáne ony otbasy ál-aýqatynyń naqty dárejesin kórsetetin ólshem retinde belgilegen. Búginde AQSH-taǵy kedeılik shegi medıanalyq kiristiń 40 paıyzyn quraıdy, al Kanadada – 50 paıyz, Shvesıa, Norvegıa, Danıa, Avstrıa, Germanıa jáne Fransıada 60 paıyz. Biz de osy tájirıbeni engizgeli otyrmyz», - dedi mınıstr.