Óskemen qalasynyń soty alaıaqtyq jasaǵany úshin bas bostandyǵynan aıyrý oryndarynda jazasyn ótep jatqan A. Ábdirahmanovqa qatysty úkim shyǵardy. Ol uıaly telefonǵa qol jetkize otyryp, oblys ákiminiń orynbasary retinde ózin tanystyryp, sý tasqynynyń saldaryn joıýǵa kómek kórsetý maqsatynda óńirdiń iri kásipkerleriniń atyna qońyraý shalǵan.
Sottalýshy bıznes sýbektisine odan ári jeńildikter men preferensıalar berý syltaýymen kásipkerdiń 50 mln teńge somasyndaǵy aqshalaı qarajatyn ıemdengeni úshin kináli dep tanyldy.
Sot úkimimen buryn shyǵarylǵan jazany qosý arqyly oǵan 8 jyl bas bostandyǵynan aıyrý jazasy taǵaıyndaldy.
Úkim zańdy kúshine engen joq. Sonymen qatar, Konstıtýsıanyń 77-baby 3-tarmaǵynyń 1-tarmaqshasyna jáne Qylmystyq-prosestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
Túrli apattardan zardap shekkenderge kómek kórsetýge baılanysty alaıaqtyq jaǵdaılarynyń jıileýine baılanysty Sybaılas jemqorlyqqa qarsy qyzmet azamattardy qyraǵylyqqa jáne tek resmı derekkózderge senýge shaqyrady.