Almaty telekomýnıkasıa jáne mashına jasaý kolejinde dýaldy bilim berý júıesi boıynsha bilim alýshylardyń sany búginde 560-qa jetip otyr.
Kolledj mektep oqýshylaryna jumysshy mamandyǵyn nasıhattaý maqsatynda kásibı baǵdar berý jumysyn jańa formatqa kóshirýdi bastady. Demek, bul óndiristik oqytý kezinde alǵashqy kúnnen bastap tálimgerdiń baqylaýymen jumys daǵdysy qalyptasqan bilikti maman daıarlaýǵa baǵyttalǵan jumys óz deńgeıinde uıymdastyrylyp jatqanyn baıqatsa kerek. Bolashaqtyń negizgi qurylysshysy – jumysshy mamandyǵyn nasıhattaý arqyly aıanbaı eńbek etip, elimizdiń ınfraqurylymynyń damýyn qamtamasyz etip júrgen ustazdar eńbegin dáripteý – bizdiń aldymyzda turǵan úlken mindetterdiń biri.
Mektep bitirýshi túlekterdiń bolashaq mamandyǵyn tańdap, tolyqtaı zerdeleýi úshin kásiporyndarǵa ekskýrsıalar jasap, ózin maman retinde sezinýine yqpal etý mańyzdy. Almaty qalasynyń «Qazposhta» aksıonerlik qoǵamynda ótkizilip kele jatqan «Dýbler kúni» is-sharasyna qatysqan oqýshynyń poshta salasyna degen qyzyǵýshylyǵy oıanary sózsiz, ol sala qyzmetiniń qyr-syryn túsinip, túısinip, bolashaq mamandyǵyn tańdaýǵa múmkindik alady.
Kolej ujymynyń elimizdegi poshta baılanysy salasynyń damýyna qosqan úlesi zor. Qazirgi tańda «Radıotehnıka, elektronıka jáne telekomýnıkasıa» mamandyǵy boıynsha ǵalamtor tartý úshin qoldanylatyn talshyqty optıkalyq kabeldi dánekerleý baǵdary tikeleı seriktesimiz – «Qazaqtelekom» aksıonerlik qoǵamy tarapynan joǵary baǵaǵa ıe. Atalmysh mamandyq sıfrlyq transformasıaǵa baǵyttalǵan ekonomıkanyń barlyq salasynda joǵary suranysqa ıe.
Jastar úshin úlken múmkindik
Jaqynda kásiptik-tehnıkalyq bilim berý júıesin transformasıalaý maqsatynda 16 ınjenerlik-pedagogıkalyq kadrymyz Germanıa, Ońtústik Koreıa, Qytaı, Brazılıa memleketterinde bolyp, taǵylymdamadan ótip qaıtty. Olar álemdik deńgeıdegi ǵylym men tehnıka salasynda bolyp jatqan jańa tehnologıalardy ıgerip, óz bilimderin jetildirip keldi. Qazir sol tájirıbeni ózderiniń baǵdarlamalaryna engizip, oqý prosesinde qoldanyp jatyr.
Ótken jyly Almaty qalasy ákimshiligi men Bilim basqarmasy kórsetken qoldaýdyń arqasynda 80 jyldan astam tarıhy bar kolejdiń eski ǵımaraty tolyqtaı súrilip, ornyna jańa ǵımarat boı kótergen edi. Sátin salsa, bolashaq jumysshy mamandyqtary ókilderi materıaldyq-tehnıkalyq bazamen jabdyqtalǵan jańa oqý kabınetteri, sheberhanalary men jataqhanasy bar zamanaýı bilim ordasynda oqıtyn bolady. Bul – memleketimizdiń jastar úshin jasap otyrǵan úlken múmkindikteriniń biri.