Almatyda qala ákiminiń tapsyrmasy boıynsha «2040 jylǵa deıin perspektıvada qalany jylýmen jabdyqtaýdy damytýdyń 2030 jylǵa deıingi jospary» ázirlendi, dep habarlaıdy aqshamnews.kz.
Bul týraly Almaty energetıka basqarmasy basshysynyń m.a. Nurbaqyt Serikbaı Máslıhattyń kezekten tys XXVII sesıasynda habarlady.
Qujat jylý jelilerin jańǵyrtý men rekonstrýksıalaýdy, eskirgen tehnologıalar men jabdyqtardy aýystyrýdy, sondaı-aq perspektıvaly qurylys aýdandarynda jańa qazandyqtar salýdy kózdeıdi.
Jobany ázirleý kezinde aldaǵy onjyldyqtarǵa resýrstardy utymdy bólýge múmkindik beretin jáne uzaq merzimdi perspektıvada jylýmen jabdyqtaýdyń turaqtylyǵyna kepildik beretin boljam júzege asyryldy.
Aıta keterligi, búginde Almatyda qoldanylýy 25 jyldan asqan jylý jelileriniń úlesi qalanyń balansyna ıesiz jelilerdi berý esebinen ósýde. Jyl saıyn 39 km qubyrdy qaıta jańartý kezinde 2040 jylǵa qaraı jelilerdiń tozý deńgeıin 20% - dan astamǵa deıin tómendetý josparlanýda.
Jańǵyrtý aıasynda apatty jaǵdaılardyń týyndaý táýekelderin edáýir tómendetýge jáne kórsetiletin qyzmetterdiń sapasyn jaqsartýǵa múmkindik beretin jańa tehnologıalar men sheshimderdi engizý kózdelgen.
Sondaı-aq, eski qubyrlardy qashyqtan basqarylatyn oqshaýlanǵan qubyrlarǵa aýystyrý josparlanǵan, bul jylý shyǵyny men tehnıkalyq qyzmet kórsetý shyǵyndaryn azaıtady. Sondaı-aq, eskirgen bekitý armatýralary zamanaýı shar klapandarymen aýystyrylady.
«Qabyldanǵan sharalar jylýmen jabdyqtaý senimdiligin arttyrýǵa, jańa tutynýshylarǵa úzdiksiz jylý berýdi qamtamasyz etýge jáne paıdalaný shyǵyndaryn azaıtýǵa múmkindik beredi», - dep túıindedi sózin Nurbaqyt Serikbaı.