Qyrǵyzstannyń Ulttyq qaýipsizdik memlekettik komıtetiniń (UQMK) tóraǵasy Kamchybek Tashıev áleýmettik jelide jasaǵan málimdemesinde 2023 jyly belgili qylmystyq avtorıtet Kamchy Kólbaevty joıý týraly sheshimniń mán-jaıyn túsindirdi. Bul týraly Aqshamnews.kz saıty habarlaıdy.
Tashıevtiń aıtýynsha, bul qadam Qyrǵyzstandaǵy qylmystyq toptardyń «paraleldi memleket» retinde qalyptasqan qurylymyna qarsy jasalǵan. «Uıymdasqan qylmystyq toptar óz ıerarhıasy men yqpal jelisine ıe boldy. Olar eldegi bılikti is júzinde óz qolyna alǵandaı boldy», – dep túsindirdi UQMK tóraǵasy.
Tashıev málimdemesinde qylmystyq toptardyń memleket júıesine uqsas qurylym qalyptastyrǵanyn aıtty. Olar «zańdaǵy ury» mártebesine ıe prezıdent, aımaqtyq «smotráshıı» jáne «polojenester» arqyly búkil elde óz bıligin ornatqan. Bul qurylym kásipkerler men turǵyndardan zańsyz aqsha jınaý arqyly kúsh-qýatyn arttyrǵan.
«Kamchy Kólbaev jáne onyń uıymdasqan qylmystyq toptary eldegi kásipkerliktiń damýyna úlken kedergi boldy. Olardyń qylmystyq áreketteri qoǵamnyń qaýipsizdigine ǵana emes, ekonomıkaǵa da zıanyn tıgizdi», – dedi Tashıev.
Kamchybek Tashıevtiń málimdeýinshe, Kamchy Kólbaevtyń joıylýy eldiń turaqtylyǵy men qaýipsizdigi úshin mańyzdy bolǵan. Memleketke paraleldi júıe qalyptastyrǵan qylmystyq toptardy toqtatý bılik organdarynyń basty mindetteriniń biri sanaldy.
«Biz bul sheshimdi eldiń ıgiligi úshin qabyldadyq. Qylmystyq toptarmen kúres – memleket egemendigin saqtaýdyń negizgi quraly. Memleket halyqtyń senimin qaıtarýy tıis», – dep tolyqtyrdy ol.
Qylmystyq toptardyń memleketke áseri týraly kóptegen sarapshylar dabyl qaǵyp kelgen edi. Sarapshylardyń aıtýynsha, qylmystyq toptardy joıý – tek Qyrǵyzstan úshin emes, búkil Ortalyq Azıa aımaǵynyń turaqtylyǵy úshin mańyzdy qadam.
Kamchybek Tashıevtiń Kamchy Kólbaev týraly málimdemesi eldegi qylmystyq toptarǵa qarsy kúrestiń mańyzdylyǵyn kórsetti. Qyrǵyzstan bıliginiń mundaı batyl sheshimi qoǵamnyń qaýipsizdigin qamtamasyz etip, memlekettiń bedelin nyǵaıtýǵa baǵyttalǵany anyq.