Koreılik KERI Elektrotehnologıa ǵylymı-zertteý ınstıtýty elektromobılder úshin ınovasıalyq jańa japqysh matany jasap shyǵardy. Bul japqysh metal jipterinen ázirlengen jáne onyń negizgi maqsaty — elektromobılderdi aıazdan qorǵaý. Jańa materıaldyń ereksheligi — onyń qyzdyrǵysh element retinde qyzmet atqara alatyndyǵynda, ol kólik salonyn jyly ustap turady, dep habarlaıdy aqshamnews.kz
Ǵalymdar bul japqyshty jasaýda Koreıanyń dástúrli «ondol» jyly eden júıesinen shabyt alǵan. «Onol» júıesi úılerde eden astynda jylý kózin paıdalanyp, úıdi birqalypty jylytýǵa múmkindik beredi. Osy ıdeıany elektromobılder úshin beıimdep, ǵalymdar jańa tehnologıany ázirledi.
Japqyshtyń negizi óte jińishke bolat jipterden jasalǵan. Osy jipterdiń dıametri nebári 50 mıkrometr, bul adamnyń shashynan da jińishke. Alaıda, bul jipter óte berik bolyp tabylady. Qýat berilgen kezde, metal jipter 500 °C-qa deıin qyzady jáne osy temperatýrany saqtap, kólik ústindegi aıazdy joıady. Osylaısha, kólik árdaıym jyly bolyp, onyń elektr júıesi aıazdan búlinýden qorǵalady.
Materıaldyń taǵy bir qyzyqty ereksheligi — ol búlingen jaǵdaıda da óziniń tıimdiligin joǵaltpaıdy. Eger japqyshtyń keıbir bólikteri jyrtylyp nemese zaqymdanyp qalsa, ol kólikti jyly ustap tura beredi, sebebi materıal birkelki jylý taratady. Bul ınovasıa elektromobılderdiń sýyq aýa raıynda da jaqsy jumys isteýin qamtamasyz etedi, ásirese qys mezgilinde elektrlik kólikterdiń akýmýlátorlarynyń tıimdiligi tómendeýi múmkin kezde.
KERI ınstıtýty jasaǵan bul japqysh elektromobılderge arnalǵan jańa «kıim» bolyp tabylady, ol tek kólikti ǵana emes, ekologıalyq taza kólik qozǵaltqyshtarynyń jumysyn da ońtaılandyrady.