Almatynyń Túrksib aýdanyndaǵy káriz qubyrlaryn óz betinshe tóseý barysynda búlingen ortasha qysymdy jerasty gaz qubyry komýnaldyq qyzmettiń jedel is-qımylynyń arqasynda qalpyna keltirildi.
Ol «Ý Asımy» mekemesine káriz qubyrlaryn óz betinshe tartý barysynda zaqymdanǵan. Jeke tulǵalar qalalyq qyzmetterdiń kelisiminsiz túnde asfáltty tesip, gaz qubyryn zaqymdaǵan. Áýesqoı ári jaýapsyz áreketterdiń saldarynan birneshe qazandyqtyń jumysy toqtatyldy.
Jóndeý-qalpyna keltirý jumystaryna «QazaqGaz Aimaq» AQ-nyń 150 jumysshysy men 6 tehnıka birligi jumyldyryldy. Tutynýshylardyń bir bóligin úzdiksiz jylýmen qamtamasyz etý maqsatynda «ATKE» JSHS-niń «Áýejaı» qazandyǵy májbúrli túrde rezervtik otyn – mazýtqa aýystyryldy.
Saǵat 14:00-degi jaǵdaı boıynsha gaz qubyryndaǵy aqaý joıyldy. Mamandar júıege qysym synaǵyn júrgizedi, sodan keıin tutynýshylardyń qaýipsizdigin qamtamasyz etý maqsatynda árbir úıge baryp, gazdy kezeń-kezeńimen qosý jumystaryn júrgizedi. Turǵyndardy qaýipsizdik tehnıkasyn saqtaýǵa jáne gazdy ózdiginen qospaýǵa shaqyramyz.
Almatynyń qala qurylysy baqylaý basqarmasy bul fakt boıynsha jospardan tys tekserý jumystaryn bastady. Sonyń nátıjesinde ákimshilik sharalar qabyldanyp, zańbuzýshylyqtardy joıý týraly nusqama beriledi.
Sonymen qatar, buzýshylyq saldaryn joıýǵa ketken barlyq shyǵyn kináli tulǵaǵa júkteledi.
Eske salaıyq, kez kelgen ınjenerlik jelilerge qosylý úshin jeke jáne zańdy tulǵalar jelilerge qosylý boıynsha tehnıkalyq sharttardy alýy, syzbanyń negizinde jobalaý-smetalyq qujattamany ázirlep, ony komýnaldyq kásiporyndarmen (SHJQ «Almaty Sý» MKK, «Almaty jylý jelileri» JSHS, «QazaqGaz Aimaq» AQ, «Alataý Jaryq Kompanıasy» AQ) kelisýi qajet. Sondaı-aq qurylys bastalǵany týraly qala qurylysy baqylaý basqarmasynan talon alyp, aýdandyq ákimdikti habardar etýi kerek. Qurylys-montaj jumystary komýnaldyq kásiporyndardyń baqylaýymen júrgizilýge tıis. Jumys aıaqtalǵan soń foto/beıne esepti Qala qurylysy baqylaý basqarmasynda tirkeý qajet.