Bul zań Prezıdentke jiberildi.
Senat depýtattary eńbek daýlary men janjaldaryn sheshý tártibine ózgeris engizý týraly zańdy maquldady, dep habarlaıdy Almaty-akshamy.kz
Zańǵa sáıkes, jumysshylarǵa bir saǵattyq eskertý ereýilin ótkizýge ruqsat berilmek.
Eńbek jáne halyqty áleýmettik qorǵaý vıse-mınıstri Aqmadı Sarbasovtyń aıtýynsha, eskertý ereýilin eńbek arbıtrajy kezinde ótkizýge ruqsat beriledi. Ýaqyty - bir saǵat. Adam sanyna da shekteý bar.
«Adam sany 50-den aspaýy kerek. Eskertý ereýili jumysshylardyń talabyn tıimdi qarastyrýǵa jáne bárine yńǵaıly sheshim qabyldaýǵa yqpal etýi kerek», - dedi Sarbasov senatta ótken brıfıńte.
Osy oraıda vıse-mınıstr tolyqqandy ereýildi ótkizý tártibin túsindirdi.
«Bári jumysshylardyń talabynan bastalady. Bul - birinshi kezeń. Eki jaq kelisimge kelmese, barlyq másele tatýlasý komısıasynda qaralady. Oǵan jumys berýshi men jumysshylardyń ókilderi teń dárejede kiredi. Tatýlasý komısıasynda eshteńe sheshilmese, eńbek arbıtrajy qurylady. Onyń quramyna da eki jaqtyń adamdary, eńbek ınspektory jáne taǵy basqa sarapshylar kiredi. Onda da kelisimge kelmese, jumysshylar ereýil jarıalaýǵa quqyly», - dep atap kórsetti Sarbasov.
Onyń aıtýynsha, búgin qabyldanǵan zańda arbıtrajdy qurý merzimi eki kúnge qysqartylady. Al sheshim shyǵarýǵa úsh kún beriledi. Sondaı-aq, kelisý komısıasyna shaǵym túsirý tártibi jan-jaqty jazylǵan.
Jumys berýshi ereýil jáne taǵy basqa sharalardy ótkizý úshin jaǵdaı jasaýǵa mindetti.
Búgin zań eki oqylymda maquldandy. Qujat Prezıdenttiń qol qoıýyna jiberildi.