Senator Nurtóre Júsip óziniń depýtattyq saýalynda sıfrlyq aýtızm – HHİ ǵasyrdyń derti ekenin aıtty.
Depýtat qazirgi tańda búkil álemde, onyń ishinde Qazaqstanda da, «sıfrlyq aýtızm» belgileri baıqala bastaǵanyn atap ótti. Balalar smartfondy uzaq ustaýy saldarynan este saqtaý, kórý jáne sóıleý qabiletinen aıyrylyp jatyr. Olardyń óz betinshe oılaýy, uzaq mátinderdi qabyldaýy, aınalaǵa nazar aýdarýy qıynǵa soǵyp otyr, dep habarlaıdy Almaty-akshamy.kz Egemen.kz-ke silteme jasap.
«Jeti atasyn jatqa biletin urpaq ornyna jeti aýyz sózdi ázer aıtatyn tolqyn paıda boldy. Skrıneıdjer, zýmmer, nemese Z – urpaq – óz ómirin elektrondy qurylǵysyz elesetete almaıtyn jańa býyn. Qazirgi tańda logonevroz aýrýy men Týret sındromy kúsheıe bastady. Tutas ult pen urpaq úlken qaýip aldynda tur. Ata-analardyń 65 paıyzy balalaryna 3-5 jastan gadjet ustatady. Bir sózben aıtqanda, qolyna «smartfon ustap týǵan» býyn ómirge keldi», - dedi depýtat.
Senator gadjetızasıa men zamanaýı tehnologıaǵa qarsy turý da durys emes ekenin aıtty. Depýtat osyǵan baılanysty mektepter men balabaqshalardaǵy ata-analar komıtetterine, sondaı-aq salalyq úkimettik emes uıymdarǵa kıbermanıanyń zıany týraly belsendi túrde aıtyp berýin usyndy. Senator sonymen qatar, óskeleń urpaqtyń densaýlyǵyna baqylaý júrgiýzýge tikeleı baılanysty usynystaryn da ortaǵa saldy.
«Úkimetke jańa týǵan nárestelerdi jappaı retınopatıa jáne aýdıologıalyq skrınıngten ótkizýdiń sapasyna mán berýdi, Almaty qalasyndaǵy A.Ostrovskıı atyndaǵy zaǵıp jáne kózi nashar kóretin balalarǵa arnalǵan №4 mektep-ınternatqa qosymsha ǵımarat salýdy usynamyz. Sonymen qatar logoped jáne oftalmolog mamandyqtaryna bólinetin memlekettik grant sanyn kóbeıtken mańyzdy», - dedi Nurtóre Júsip.