Almaty qalasynyń ákimi Erbolat Dosaev «Altyn belgi» ıegerlerin quttyqtady
Almatyda, Respýblıka Saraıy aldyndaǵy Abaı alańynda shahar basshysy Erbolat Dosaevtyń qatysýymen úzdik túlekterge «Altyn belgini» tabystaý rásimi ótti.
Saltanatty is-sharaǵa sondaı-aq Abaı atyndaǵy Qazaq ulttyq pedogogıkalyq ýnıversıteti dırektorlar keńesiniń tóraıymy Gúlmıra Esimbaeva, eńbek ardagerleri, úzdik pedagogtar qatysty.
Ashyq aspan astyndaǵy merekeli keshti halyqaralyq «Boztorǵaı» baıqaýynyń jeńimpazdary «Qazaqstanym» ánimen ashty.
Bıyl qala mektepterin 12 myńnan astam túlek bitirse, olardyń 605-i «Altyn belgi» ıegeri atandy.
Almaty qalasynyń ákimi Erbolat Dosaev úlken ómirge qadam basqaly turǵan úzdik túlekterge degen izgi tilegin arnady, olardyń jańa qadamdaryna tabys tiledi.
«Qurmetti mektep bitirýshi jas túlekter!
Sizder balalyq shaqtyń mekeni altyn uıalaryńyzben qoshtasyp, jańa ómirge qadam basqaly tursyzdar. Osynaý qýanyshty sátte barshalaryńyzdy shyn júrekten quttyqtaımyn! Bıylǵy jyldy Memleket basshysy Balalar jyly dep jarıalady. Osynaý tarıhı jylda úlken ómirge qanat qaqqaly tursyzdar. Men de osydan otyz bes jyl buryn dál osyndaı qýanyshqa toly sátti basymnan keshken edim. Osynaý qýanyshqa toly sátterińiz sizderdi árdaıym bıikterge bastaı bersin!
Memleket basshysy Qasym-Jomart Toqaev daryndy jastarmen kezdeskende: «Qazirgi zaman bilim men ǵylymnyń dáýiri, árbir talantty, eńbekqor adam osy zamannyń batyry jáne ult maqtanyshy bola alady. Men qazaq eliniń jastaryna senemin» dep úlken senim bildirgen edi. On bir jylǵy bilimniń belgisi – orta bilim atestatyn bıyl qala mektepterin bitirgen 13 myńnan astam túlek alsa, olardyń 574-i qalanyń jalpy bilim berý mektepterinen, 31-i respýblıkalyq bilim oshaqtarynan júzden júırik shyǵyp, «Altyn belgi» ıegeri atanyp otyr. Uly Abaı babamyz «atańnyń balasy bolma, adamnyń balasy bol» dep aıtqandaı, sizderdi bolashaqta joǵarǵy bilimdi, bilikti maman bolyp, qalamyzdyń órkendeýine laıyqty úles qosady dep senemiz. Joldaryńyz ashyq, keleshekterińiz jarqyn bolsyn!»,– dedi shahar basshysy.
Marapat ıeleri arasynda respýblıkalyq, halyqaralyq olımpıada jeńimpazdary bar. Saltanatty mereke sońynda mektep bitirýshiler Qazaq ulttyq opera jáne balet teatry vokalısteriniń mýzykalyq súıemeldeýimen «Túlekter válsin» bıledi. Shara sońy merekelik otshashýǵa ulasty.
