Búgin Memleket basshysy Qasym-Jomart Toqaev Qazaqstan halqyna Joldaýynda ınvestısıa tartýdyń mańyzyn taǵy bir márte naqtylap, Úkimetke jańa mindetter júktedi. Prezıdenttiń aıtýynsha, qazir álemde ınvestısıa úshin báseke kúsheıip barady, sondyqtan Qazaqstanǵa jańa ınvestısıalyq kezeńge qadam basý qajet. Osy tusta qarjy, bırja, makroekonomıka sarapshysy, ekonomıs Aıbar Oljaı Prezıdent Joldaýyndaǵy toqtalý kerek tarmaqtardy atap ótti. Aqshamnews.kz tilshisiniń materıalynan oqyńyz.
"Endi ár ınvestor óz jobalaryn tezirek iske asyrady dep senemiz"
Aıbar Oljaıdyń oıynsha, Prezıdenttiń Úkimetke ınvestısıa tartý júıesin túgel jańǵyrtý jónindegi tapsyrmasy burynnan qordalanǵan máseleni sheshýge jol ashady.
"Joldaý ekonomıkadaǵy ınvestısıanyń mańyzyn bárine uǵynyqty qylyp taǵy bir shegeledi. Prezıdent iri ǵana emes, orta jáne shaǵyn ınvestorlarmen de jumys isteý keregin aıtty. Buǵan deıin ákimder iri jobalarǵa kóp qyzyǵatyn. Al orta ınvestorlar búrokratıa toryna túsip, aımaqtarǵa barsa da, ákimderge jolyǵa almaı júretin. Endi naqty jospar jasalyp, Prezıdenttiń ózi sıgnal bergen soń, ár ınvestor óz jobalaryn tezirek iske asyrady dep senemiz", – deıdi Oljaı.
Jasandy ıntellekt – jańa dáýirdiń bastaýy
Ekonomısiń pikirinshe, Joldaý Qazaqstannyń jańa tarıhı kezeńge qadam basqanyn ańǵartty. Bul dáýir – adamı faktordy barynsha azaıtyp, sheshim qabyldaý isinde jasandy ıntellektke súıený dáýiri.
"Joldaý ekonomıkada adamı faktordy attap ótip, jasandy ıntellekt sheshimderine aýysatyn kezeńdi bastady. Bul ásirese ruqsat berý men baqylaý fýnksıalaryn búrokratıadan aryltýǵa múmkindik beredi. Mysaly, sýperkompúterge barlyq zańdar men erejelerdi júktep, olardyń artyq ári qaıtalanatyn tustaryn alyp tasta dep tapsyrsaq, ol birneshe kúnde bárin rettep beredi", – dep atap ótti ol.
JI-diń potensıalyn paıdalanbasaq, ókinip otyrmaqpyz - Aıbar Oljaı
Aıbar Oljaı sonymen birge elimizde sıfrlandyrýdyń tolyq iske aspaǵan tustaryn synǵa aldy.
"Sıfrlandyq dep júrgen elimizde keıbir kelisim-sharttar, istelgen jumys aktileri áli kúnge deıin qaǵazben jasalyp, kýrerdi qınap qolmen tasylyp júrgeni uıat. Bul Qarjy mınıstrliginiń atyna syn. Áli de qaǵazǵa basylatyn myńdaǵan ochet bar. Olardy tasyp júrgen, kabınetterge qorappen jınaýmen aınalysatyn myńdaǵan qyzmetker bar. Jeke tulǵalar máselesi tez sıfrlansa da, zańdy tulǵalar men memlekettik apparatqa kelgende bizdiń sıfrlandyrý batpaqqa batyp qaldy", – deıdi qarjyger.
Aıbar Oljaıdyń pikirinshe, Prezıdent Toqaevtyń Joldaýy Qazaqstandy jańa ınvestısıalyq kezeńge bastap, jasandy ıntellektini engizýdiń naqty jolyn kórsetti.
"Prezıdent JI-diń orasan áleýetin jaqsy túsinip otyr. Sebebi JI-diń orasan potensıalyn qazir paıdalanbasaq, erteń kóshten qalyp ókinip otyrmaqpyz. Sol joldaýdy Parlament qabyrǵasynda oflaın tyńdaǵan biraz adamnyń kózinde "Jasandy ıntellekt. Ol ne jáne qalaı bolady?" degen suraq baıqaldy. Kóbi Prezıdent aıtyp otyrǵan potensıaldy áli túsinip úlgermegen sıaqty. Biraq eń bıik minberden aıtylǵannan keıin, endi Qazaqstandy toqtatý qıyn bolady", – dep túıindedi Oljaı.