Búgin Memleket basshysy Qasym-Jomart Toqaev Qazaqstan halqyna Joldaý jarıalady. QR Memlekettik keńesshisi Erlan Qarın onyń mańyzdy tustaryn taldap berdi. Ol qujattyń basty ózegin de atap ótti. Tolyǵyraq Aqshamnews.kz materıalynda.
"Sıfrlandyrý – jańa ulttyq ıdeıa"
Erlan Qarınniń oıynsha, sıfrlyq tehnologıalardy engizý Qazaqstan úshin jańa ulttyq ıdeıaǵa aınaldy. Jasandy ıntellekt pen sıfrlandyrý quraldaryn jedeldetip qoldaný ekonomıkanyń barlyq salasyna yqpal etedi.
"Bul qadamnyń barlyǵy jınaqtala kelip, Qazaqstannyń jańa Ulttyq sıfrlyq damý strategıasyna biriktiriledi. Qazaqstan jańa tehnologıalardy damytý men engizýde keshendi ári júıeli sheshimder qabyldaǵan álemdegi alǵashqy elderdiń biri bolyp otyr. Bul rette Qazaqstan bolashaqta tehnologıalyq turǵydan damyǵan memleket atanýdy kózdeıdi. Osylaısha, bıylǵy Joldaýda sıfrlyq transformasıa men jasandy ıntellektini engizý bizdiń el úshin jańa ulttyq ıdeıa retinde aıqyndaldy",- dep jazdy ol.
Joldaýdaǵy jańa saıası bastamalardyń negizgi qyrlary
Memlekettik keńesshiniń aıtýynsha, Joldaýda usynylǵan parlamenttik reforma prezıdenttik saıasattyń basty formýlasyn – «Kúshti Prezıdent – Yqpaldy Parlament – Esep beretin Úkimet» qaǵıdatyn odan ári damytady.
Prezıdenttiń taǵy bir mańyzdy qadamy – referendým mádenıetin nyǵaıtý. Qarınniń paıymynsha, bul sheshim el bolashaǵyna qatysty túıindi máselelerdiń tek halyqpen keńese otyryp qabyldanatynyn kórsetedi. 2022–2023 jyldardaǵy reformalar men AES salý jónindegi referendým da osyndaı ashyqtyqtyń aıǵaǵy boldy.
Sabaqtastyq pen birizdilik – saıası júıeniń turaqtylyǵy
Erlan Qarın sondaı-aq, negizgi maqsat - saıası júıeniń ınstıtýsıonaldyq negizderin odan ári nyǵaıtý ekenin aıryqsha atap ótti.
"Osy tusta aıryqsha atap óterligi, áńgime Konstıtýsıaǵa jedel túrde ózgerister engizý nemese Parlament saılaýyn jarıalaý týraly bolyp otyrǵan joq. Maqsat bul emes. Basty ári negizgi maqsat – saıası júıeniń ınstıtýsıonaldyq negizderin odan ári nyǵaıtý. Sondyqtan Prezıdent oılastyrylǵan, birizdilikke negizdelgen dáıekti tásildi quptaıdy. Eń aldymen sarapshylar men kópshilik qaýym arasynda jan-jaqty ári tereń talqylaý júrgizý qajet. Osylaısha, Qazaqstan kezekti ret kezeń-kezeńimen jáne jan-jaqty júzege asyrylatyn saıası jańǵyrýdyń úlgisin kórsetti", - dep jazdy Memlekettik keńesshi.