Kólik vıse-mınıstri Satjan Ablalıev Kavkaz jáne Ortalyq Azıa qurylys forýmynyń ashylýynda Qazaqstan joldaryn baǵalaý baǵdarlamasy — KazRAP-tyń iske qosylǵanyn jarıalady.
Bul bastama jol qozǵalysy qaýipsizdigin qamtamasyz etý men avtojoldardyń jaǵdaıyn jaqsartýǵa baǵyttalǵan júıeli tásildi kózdeıdi, dep habarlaıdy aqshamnews.kz.
KazRAP - jol ınfraqurylymynyń qaýipsizdigin arttyrý boıynsha ulttyq júıeniń negizgi elementine aınalady. Baǵdarlama joldardyń jaı-kúıin halyqaralyq ádistemege súıene táýelsiz baǵalaýdy, jol-kólik oqıǵalaryn aldyn-alýǵa, ınvestısıalardyń tıimdiligine monıtorıń júrgizýdi jáne jol qaýipsizdigi salasyndaǵy strategıalyq josparlaýdy kózdeıdi.
Baǵdarlama Halyqaralyq joldardy baǵalaý baǵdarlamasymen (iRAP) birlese júzege asyrylady.
Kelisimge KAZNIIBDD dırektory Arystan Masanov pen iRAP-tyń atqarýshy bas dırektory Greg Smıt qol qoıdy.
Sonymen qatar, Forýmnyń ashylýynda Vıse-mınıstr vedomstvonyń qazirgi jáne josparlanyp otyrǵan bastamalaryna da toqtalyp, halyqaralyq kólik dálizderin damytýǵa, jol ınfraqurylymyn jańǵyrtýǵa, sıfrlyq tehnologıalardy engizýge jáne salanyń ınvestısıalyq tartymdylyǵyn arttyrýǵa basa mán beriletinin atap ótti.
Forýmǵa memlekettik organdardyń, jeke sektordyń, ınjenerlik qaýymdastyq pen zań salasynyń ókilderinen turatyn 20 elden 120 qatysýshy jınaldy.
Eki kún ishinde 9 taqyryptyq paneldik sesıa ótti. Olar iri ınfraqurylymdyq jobalardy iske asyrý, halyqaralyq qarjy ınstıtýttarynyń qatysýy, jol qaýipsizdigi ınjenerıasy, FIDIC standarttary boıynsha kelisimsharttardy daıyndaý, daýlardy sheshý keńesteriniń qyzmeti, halyqaralyq arbıtraj jáne qurylys salasyndaǵy kásibı áleýetti damytý máselelerin qamtıdy.