Almatyda jergilikti deńgeıde materıaldyq emes mádenı murany saqtaý jáne ornyqty damytý máselelerine arnalǵan qazaqstandyq sarapshylarǵa arnalǵan aptalyq ulttyq trenıń ótip jatyr.
Bul is-shara Qazaqstan Respýblıkasynyń Prezıdenti Qasym-Jomart Toqaevtyń táýelsizdik pen egemendiktiń negizi sanalatyn ulttyq biregeılikti nyǵaıtý jónindegi tapsyrmalaryn iske asyrý aıasynda uıymdastyryldy, dep habarlaıdy aqshamnews.kz/
İs-sharanyń ashylý rásimine memlekettik jáne qoǵamdyq qurylymdardyń ókilderi, ǵalymdar, mádenıet qaıratkerleri men halyqaralyq seriktester qatysty. Trenıńke Qazaqstannyń bes pılottyq óńirinen kelgen 45 maman, sondaı-aq murajaılardyń, shyǵarmashylyq uıymdardyń jáne dástúrli sport túrleri qaýymdastyqtarynyń ókilderi qatysýda.
İs-sharany Qazaqstan Respýblıkasynyń IýNESKO jáne ISESKO isteri jónindegi Ulttyq komısıasy men Azıa-Tynyq muhıty óńirindegi materıaldyq emes mádenı mura salasyndaǵy IýNESKO óńirlik oqý ortalyǵy (Beıjiń, QHR) birlese uıymdastyrýda.
Materıaldyq emes mádenı mura – aýyzsha dástúrler men epostar, ádet-ǵuryptar, dástúrli oıyndar, qolóner, mýzyka men bı, ulttyq taǵamdar men halyqtyq jarystar sıaqty urpaqtan urpaqqa beriletin tiri mádenıet. Jahandaný úderisi kúsheıgen saıyn bul mádenı qundylyqtardyń joıylyp ketý qaýpi de basym. 2003 jyly IýNESKO materıaldyq emes mádenı murany qorǵaý týraly konvensıany qabyldap, memleketterdiń kúsh-jigerin biriktirýge bastamashy bola otyryp, osy murany saqtaýǵa jáne bolashaq urpaqqa jetkizýge yqpal etip keledi.
Oqý baǵdarlamasy mamandardyń biliktiligin arttyrýǵa, qujattamany neǵurlym dál júrgizýge, sondaı-aq kóshpeli órkenıettiń mádenı bolmysynyń ajyramas bóligi sanalatyn osy murany keńinen nasıhattaýǵa baǵyttalǵan.