Almaty qalasy Qoǵamdyq damý basqarmasynyń Qoǵamdyq damý ortalyǵy bastamasymen «Kitap – asyl qazyna» ádebı jobasy aıasynda qazaq ádebıeti men rýhanıatynyń kórnekti ókili, aqyn, aýdarmashy, pýblısıs, mádenıet qaıratkeri Erjan Alashtýǵannyń shyǵarmashylyǵyna arnalǵan «Joldar men Hattar...» atty ádebı benefıs ótti.
İs-shara kitap oqý mádenıetin qalyptastyrý, kórkem ádebıettiń adam sanasyna áserin nasıhattaý, óskeleń urpaqtyń kitapqa, poezıaǵa degen qyzyǵýshylyǵyn arttyrý. Sonymen qatar, qazaqstandyq qalamgerlerdiń shyǵarmashylyǵyn tanytý, ádebıetti qoǵamdyq sanaǵa ornyqtyrý, ult rýhanıatyn baıytýǵa úles qosý maqsatynda uıymdastyrylǵan.
İs-shara erkin formatta ótti. Ádebı benefıs aıasynda aqynnyń shyǵarmashylyǵyna arnalǵan poetıkalyq kompozısıalary usynyldy. Sonymen qatar ádebı benefıske qoǵam jáne mádenıet qaıratkerleri, kompozıtorlar, ádebıettanýshylar men jas qalamgerler qatysyp, shyǵarmashylyq týraly pikir almasty.
- «Joldar men hattar» degen meniń qazirgi shyǵarmashylyǵymnyń konsepsıasy dese bolady. Sebebi meniń keıingi 10 jyldaǵy ómirim – joldarda, al jaqyndarymmen habarlasýym – hattarda ótti. Búgingi kesh jalqy adam týraly, jalqy adamnyń jalpyǵa qatysy týraly jáne jalpynyń jalqyǵa áseri týraly. Keıingi 4-5 jyldyń kóleminde halyqaralyq úlken jobany aıaqtadyq. TMD memleketteriniń zamanaýı ádebıeti týraly 5 tomdyqty ázirledik. Kezinde ustazym Nyǵmet Ǵabdýllınge «biz álem ádebıetin orys tilinde oqyǵan eń sońǵy býyn bolaıyqshy» dep bergen ýádem bar edi. Sol ýádeni oryndaýǵa tyrysyp jatyrmyn. Qazir dúnıejúzi poezıasynyń qazaq tilindegi tájimasyn – «Jahar jyry» degen 3 tomdyqty daıyndap boldyq. Sony ádebıet, jýrnalısıka fakúltetterine usynamyz, – dedi Erjan Alashtýǵan.
Aıta ketken jón, Erjan Alashtýǵan – Halyqaralyq «Alash» ádebı syılyǵynyń laýreaty, TÚRKSOI arnaıy syılyǵynyń jáne Túrki álemi ádebıetshileri birlestiginiń Atatúrik atyndaǵy syılyǵynyń ıegeri, Halyqaralyq «Zamanaýı ádebıet» jobasynyń úılestirýshi-redaktory, «AR» Baspa Úıiniń jetekshisi jáne «Álem ádebıeti» jýrnalynyń bas redaktory.
