1 men 30 maýsym aralyǵynda, Qazaqstan polısıasy kúnine oraı ótkizilip jatqan respýblıkalyq "Zań jáne Tártip" aılyǵy aıasynda Almatyda "Ańshy men balyqshy – taza tabıǵat úshin" atty ekologıalyq naýqan bastaldy.
Bul týraly Aqshamnews.kz Polisia.kz-ke silteme jasaı otyryp habarlaıdy.
Aýqymdy sharanyń maqsaty — qorshaǵan ortaǵa jaýapkershilikpen qaraý mádenıetin qalyptastyrý, ańshylyq jáne sý qoımalary aýmaqtarynyń lastaný máselelerine nazar aýdarý, sondaı-aq tabıǵı baılyqty qorǵaý baǵytynda azamattyq ustanymdy nyǵaıtý.
Naýqan barysynda Almaty qalasy polısıa departamentiniń qyzmetkerleri memlekettik organdar, ańshylar men balyqshylardyń qoǵamdyq birlestikteri, sondaı-aq qarý aınalymy salasynda jumys isteıtin uıymdarmen birlesip turǵyndarmen túsindirý kezdesýlerin ótkizdi. Tabıǵat aıasynda júrip-turý erejeleri tanystyrylyp, ańshylyq alqaptar men sý jaǵalaýlary turmystyq qaldyqtardan tazartyldy.
– 2025 jyl İshki ister mınıstrligi júıesinde "Profılaktıka jyly" dep jarıalandy. Bizdiń mindetimiz – quqyq buzýshylyqtardy boldyrmaýmen qatar, azamattardyń zańǵa, tabıǵatqa degen qurmetin nyǵaıtý. Tabıǵat tazalyǵy – bul da qaýipsizdiktiń kepili. Naýqanǵa belsendi qatysqan azamattarǵa alǵysymyz sheksiz. Mundaı ıgi bastamalar dástúrge aınalyp, zań men tártipke janashyr jandardy biriktiredi dep senemiz, – dedi Almaty qalasy PD ákimshilik polısıa basqarmasy bastyǵynyń orynbasary Darhan Aıymbetov.
Polısıa qyzmetkerleri barlyq ańshylardy, balyqshylardy jáne tabıǵatqa beıjaı qaramaıtyn turǵyndardy atsalysýǵa shaqyrady.