Fılm Italıa, Ispanıa, Germanıa, Fransıa, Nıderland, Belgıada turatyn qazaqtar týraly túsirilgen.
HH ǵasyrdyń basyndaǵy qazaq tarıhy týraly áńgime bola qalsa, «jer betine tarydaı shashylǵan qazaq» degen tirkes aıtylatyny bar. Sol tarıhty jasaýshylardyń kóbiniń urpaǵy qazir alty qurlyqtyń ár qıyryn meken etip jatyr. Ata mekeninen, qazaqı ortadan ajyraǵandaryna ǵasyrǵa jýyq ýaqyt bolsa da, eresekteri tili men dinin saqtap, urpaq boıyna ulttyq bolmysty darytýdan jańylmaı keledi.
«Jibek joly» telearnasynyń «Qıandaǵy qandastar» atty jobasy shet jurtta qalǵan, taǵdyry talaıly qandastarymyzdyń búgingi turmysy men qazirgi jaǵdaıy, keshegi qıyndyqtaryn arqaý etedi. Joba kórermenge 24 qyrkúıekte jol tartpaq. Ár aptanyń senbisi kúni saǵat 14:30-da efırge shyǵady.
«Baǵdarlama 10 serıadan turady. Biz Italıa, Ispanıa, Germanıa, Fransıa, Nıderland, Belgıada turatyn qazaqtar týraly túsirdik. Osy elderdegi baýyrlarymyz týraly úlken sıkldi fılmder usynatyn bolamyz», -deıdi jobanyń prodúseri Alpamys Sharımov.