Jetisý aýdany turǵyndarymen kezdesý barysynda Almaty ákimi Erbolat Dosaev áleýmettik ınfraqurylymdy damytý jumystary týraly aıtty.
Qala basshysynyń málimdeýinshe, aýdan halqynyń ósýin eskere otyryp, oqýshy oryndarynyń tapshylyǵyn azaıtý maqsatynda mektepter men balabaqshalardy salý jáne rekonstrýksıalaý jumystary júıeli túrde júrgizilip keledi.
Aıta keteıik, búginde aýdanda 3,3 myń oqýshy orny jetispeıdi. Bul máseleni sheshý úshin 2024 jyldyń qyrkúıeginde №103 mektepke 200 oryndyq qosymsha ǵımarat salyndy.
«Jaıly mektep» ulttyq jobasy aıasynda Boraldaı kóshesinde 1 200 oryndyq jańa mekteptiń qurylysy jalǵasýda. Onyń ashylýy 2025 jyldyń qyrkúıegine josparlanǵan», – dedi Erbolat Dosaev.
Buǵan qosa, №43 mektepke 280 oryndyq qosymsha ǵımarat salý úshin 2024 jyldyń shilde aıynda JSQ ázirleý bastaldy. Memlekettik saraptamanyń qorytyndysyn alǵan soń bıyl tamyzda qurylys jumystary bastalady. Nysandy 2026 jyldyń shilde aıynda aıaqtaý josparlanyp otyr.
№112 mektepke 300 oryndyq qosymsha ǵımarat salý jumystary buǵan deıin «SheberBuild» JSHS-nyń kelisimsharttyq mindettemelerdi oryndamaýyna baılanysty toqtatylǵan bolatyn. 2024 jyldyń naýryzynda jańa merdiger anyqtalyp, qurylys qaıta jalǵasady. Qosymsha qurylysty aıaqtaý jańa oqý jyly bastalǵanǵa deıin josparlanýda.
Qosymsha ǵımarat qurylysy aıaqtalǵannan keıin negizgi mektep ǵımaratyn rekonstrýksıalaý jumystary bastalady.
Qabyldanyp jatqan sharalardyń arqasynda Almaty mektepterin bir aýysymdy oqý júıesine kóshirý jalǵasýda. Kelesi oqý jylynda 200-den astam memlekettik mekteptiń 43-i bir aýysymdy oqytý júıesine (ósim 12,5%-dan 18,4%-ǵa deıin) kóshedi.
Mektep ınfraqurylymyn damytýǵa erekshe nazar aýdarylyp otyr. Byltyr 89 mektepke 168 jańa úlgidegi pándik kabınet satyp alyndy, bul zamanaýı jabdyqtalǵan kabınetterdiń úlesin 86,3%-ǵa deıin arttyrdy.
Sonymen qatar, Jetisý aýdanyndaǵy mektepke deıingi uıymdardaǵy oryn tapshylyǵyn azaıtý úshin byltyr Aınabulaq shaǵyn aýdanynda 160 oryndyq jańa balabaqsha ashyldy. Osy jyldyń tamyzynda №163 balabaqsha ǵımaratyn 380 orynǵa qaıta jańartý jáne Ratýshnyı kóshesi, 139 mekenjaıyndaǵy 280 oryndyq balabaqsha úshin satyp alynǵan ǵımaratty rekonstrýksıalaý jumystary bastalady.
Qurylys-montaj jumystary 2026 jyldyń ekinshi toqsanynda aıaqtalady.