Jetisý aýdany turǵyndarymen kezdesý barysynda Almaty ákimi Erbolat Dosaev jol-kólik ınfraqurylymyn jańartý jáne jolaýshylar tasymaly sapasyn arttyrý jumystary týraly aıtty, dep habarlaıdy aqshamnews.kz
Shahar basshysy byltyr aýdanda 21 km bolatyn 29 kóshe ortasha jóndeýden ótkenin, bıyl 36 kóshede 19 shaqyrym joldy jóndeý josparlanyp otyrǵanyn jetkizdi.
Sonymen qatar, aǵymdaǵy jóndeý aıasynda 2024 jyly 30 myń sh.m. jol jabyny jańartyldy, al osy jyly taǵy 35 myń sh.m. jol jóndelmek. Byltyr 34 shaqyrym aryq júıesin salý nátıjesinde aýdandaǵy barlyq sý basý qaýpi bar aımaqtar joıyldy.
«Byltyr Jolymbet kóshesindegi Esentaı ózenindegi kópirdi tekserý nátıjesinde beton qurylymdardyń qatty zaqymdanǵany jáne tirekterde jaryqtar paıda bolǵany anyqtaldy. Nebári 6 aı ishinde jańa kópir salynyp, jol eni 8 metrden 14 metrge deıin keńeıtildi. 2025 jyldyń maýsymynda Seıfýllın dańǵyly men Jansúgirov kóshesiniń qıylysyndaǵy jolaıyryqtyń qurylysy aıaqtalady. Bul kólik torabynyń ótkizý qabileti 20%-ǵa artyp, Jetisý aýdanynyń basqa bóliktermen baılanysyn aıtarlyqtaı jaqsartady», – dedi Erbolat Dosaev.
Kezdesý barysynda Almaty ákim aýdannyń qoǵamdyq kólik qyzmetin jaqsartý boıynsha atqarylyp jatqan jumystardy atady. Ótken jyly qaladaǵy avtobýstar sany 1 509-dan 1 740-qa deıin kóbeıtildi, bul 11 jańa marshrýt ashýǵa jáne 44 qoldanystaǵy baǵytty kúsheıtýge múmkindik berdi.
Jalpy, bıyl qalalyq qoǵamdyq kóliktiń qoljetimdiligin arttyrý maqsatynda taǵy 800 jańa avtobýs satyp alý josparlanyp otyr.