Májilis ishki ister organdarynyń qyzmeti salasyndaǵy normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha zańdy ekinshi oqylymda qabyldady, dep habarlaıdy aqshamnews.kz
Zań «Memlekettik apparattyń qyzmetin búrokratıadan aryltý jónindegi sharalar týraly» Prezıdent Jarlyǵyn iske asyrý maqsatymen ázirlengen.
Túzetýlerge sáıkes «jergilikti polısıa qyzmeti» uǵymy alynyp tastalady. Buǵan 2016 jyly qurylǵan Jergilikti polısıa qyzmeti óz tıimdiligin is júzinde dáleldeı almaǵany sebep boldy. Jergilikti polısıa qyzmeti quramynda ýchaskelik ınspektorlar, patrúldik, ıývenaldy, tabıǵatty qorǵaý polısıasy jáne áıelderdi zorlyq-zombylyqtan qorǵaý bólimsheleri bolǵan. Alaıda túzetý avtorlarynyń aıtýynsha, bul qyzmet ózine júktelgen negizgi mindetterdi, ıaǵnı, qoǵamdyq tártipti saqtaý, quqyq buzýshylyqtardyń aldyn alý jáne jol qaýipsizdigin qamtamasyz etýdiń ornyna, abattandyrý erejeleriniń buzylýyn anyqtaý, qurylys qaldyqtaryn shyǵarý syndy ekinshi kezektegi jumystarmen aınalysa bastaǵan.
İshki ister mınıstrligi Jergilikti polısıa qyzmeti men Ákimshilik polısıa basqarmasyn qaıta uıymdastyryp, olardyń bazasynda eki jańa basqarma qurylady. Olar: quqyq buzýshylyqtardyń aldyn alý jáne qoǵamdyq qaýipsizdikti qamtamasyz etý basqarmalary. Ár qyzmet óziniń tikeleı mindetterimen aınalysady.
Sondaı-aq kólik polısıasy bólimshelerin retke keltirý maqsatymen «jelilik» degen termın «kólikte» dep ózgertiledi. Al áskerı-tergeý organdary ishki ister organdarynyń aýmaqtyq qurylymynan alynyp tastalady, sebebi olar İİM quramyndaǵy derbes bólimshe retinde bólingen.