Almatynyń jańa ETJ jasyl jelekter alańyn 2030 jylǵa deıin 3 ese kóbeıtýdi kózdeıdi
Almaty ákimdigi sarapshylarmen jáne qoǵam ókilderimen talqylaýdan keıin qalanyń 2040 jylǵa deıingi Bas josparyna sáıkes ázirlengen egjeı-tegjeıli josparlaýdyń jańa jobalaryn (ETJ) bekitti.
Qalalyq josparlaý jáne ýrbanıstıka basqarmasy atap ótkendeı, jańa ETJ-da saıabaqtar, skverler, býlvarlardy qosqanda, jalpy paıdalanymdaǵy jasyl jelekter alańyn 2030 jylǵa deıin 3 ese kóbeıtý kózdelgen.
Sonymen qatar, saýda keńistigin jańartý aıasynda bazarlardyń aýmaqtaryn kógaldandyrý josparlanǵan. Mysaly, Almaly aýdanyndaǵy Rozybakıev kóshesiniń boıyndaǵy «Tastaq» jáne «Optovka» bazarlary jańǵyrtylady. Jetisý aýdanynda Soltústik aınalma jol boıyndaǵy bazarlardy jańǵyrtý, sonymen birge, sý qorǵaý beldeýlerin abattandyrý jáne tazartý kózdelgen. Bul sharalar saýda alańdarynyń sapasyn edáýir arttyrady jáne kelýshiler men kásipkerlerge qolaıly jaǵdaı jasaıdy.
Buǵan qosa, júrdek kólik qańqasy men kósheler jelisin engizý esebinen qalanyń barlyq aýdany bir-birine biriktiriledi. Qala turǵyndary qalanyń kez kelgen jerine ońaı bara alady. Mundaı qozǵalystyń dálizderi bıznes úshin, onyń ishinde saýda salasynda tartymdy bolady.
Jalpy, ETJ turaqty jáne fýnksıonaldy qalalyq keńistik qurýǵa baǵyttalǵan. Olar qala qurylysyn aımaqtarǵa bólýdiń, qyzyl syzyqtardyń, halyqqa áleýmettik, mádenı jáne komýnaldyq qyzmet kórsetý nysandaryn ornalastyrý úshin aýmaqtardy rezervteýdiń, kóshe-jol jelisin uıymdastyrýdyń, ınjenerlik komýnıkasıalardy júrgizýdiń, aýmaqtardy abattandyrý men kógaldandyrýdyń negizgi baǵyttaryn belgileıdi.