Almatyda jańa ETJ: qalada uzyndyǵy 200 shaqyrym jasyl dálizder men velojoldar qurylady
Almaty ákimdigi qalanyń 2040 jylǵa deıingi Bas josparyna sáıkes ázirlengen egjeı-tegjeıli josparlaýdyń jańa jobalaryn qabyldady.
ETJ ázirleýshileri basshylyqqa alǵan qaǵıdanyń biri – qala kóshelerinde júrýshilerdiń ár toby úshin jeke ınfraqurylym, atap aıtqanda trotýarlar, velojoldar, avtokólik joldary, qoǵamdyq kólikke arnalǵan jolaqtar qurylýǵa tıis.
Máselen, tarıhı ortalyqta ETJ boıynsha jaıaý júrginshiler úshin qalpyna keltiriledi, al qalǵan aýdandarda jaıaý júrginshiler baılanysy júıesi jolǵa qoıylady - 2030 jylǵa qaraı Almatyda qosymsha 200 shaqyrym jaıaý júrginshiler aımaqtary men velojoldar qurylady.
Jalpy, ETJ Medeý shatqaly, Baým toǵaıy, Saıran kóli, Boraldaı toǵandary, İle-Alataý tabıǵı parkiniń aýmaǵy jáne t.b. tabıǵı keshender arasynda jasyl dálizder qurý kózdelgen.
Bul úshin Úlken jáne Kishi Almaty, Esentaı jaǵalaýlaryn abattandyrý jáne kógaldandyrý aıaqtalyp, ÚAK boıynda demalys aımaǵy jáne basqa da jasyl dálizder qurylady. Orman-saıabaq aımaǵy Kókqaınar kentiniń shyǵysynda, Shańyraq 1 jáne 2 shaǵyn aýdandary arasyndaǵy saıda, «Batys» polıortalyǵynda – jańa jelilik saıabaqta paıda bolýǵa tıis. Qulja kúre joly men Buqtyrma kóshesiniń qıylysy aýdanynda (áýejaıǵa barar jolda) kólemi 120 ga kól men eki ózeni bar tabıǵı aýmaqty abattandyrý jalǵasady.
Buǵan qosa, Almatynyń keshendi kólik sqemasyn (KKS) ázirleý aıasynda velosıped kóligi ınfraqurylymyn damytýdyń naqty baǵdarlamasy qalyptastyrylyp jatyr. Veloınfraqurylymdy keńeıtý boıynsha jobalar bıyl júzege asyryla bastaıdy. 2024 jyly shamamen 20 shaqyrym kóshe úshin jobalardy ázirleý jáne iske asyrý josparlanǵan.
Velojolaqtardyń uzaqtyǵy jáne jobalardy iske asyrý merzimderi jobalaý-smetalyq qujattamany (JSQ) ázirlegennen jáne naqty jobaǵa saraptamanyń oń qorytyndysyn alǵannan keıin aıqyndalady.
Esterińizge sala keteıik, Bas josparda megapolısti damytýdyń monosentrıstik modelinen polısentrıstik modelge kóshý qaǵıdaty bar. Osylaısha, 2030 jylǵa deıin 5 polıortalyq qurylady, bul «Shyǵys qaqpasy», «Tarıhı ortalyq», «Soltústik», «Ońtústik-batys», «Batys» syndy arnaıy aımaqtar, qoǵamdyq jáne iskerlik belsendilik ortalyqtary.