Almaty qalasy, Almaty jáne Jetisý oblystary boıynsha qylmystyq-atqarý júıesi departamentine qarasty №11 mekemesinde «Nelson Mandela» kúnine oraı «Azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konvensıa» týraly dáris ótti, dep habarlaıdy almaty-akshamy.kz.
Halyqaralyq Nelson Mandela kúnin BUU Bas assambleıasy 2009 jyldyń qarashasynda bekitken. Jyl saıyn 18 shildede Ońtústik Afrıkadaǵy aparteıdke (násildik kemsitýshilik) qarsy eń tanymal kúreskerlerdiń biriniń týǵan kúninde atap ótiledi. Halyqaralyq merekeler kúntizbesinde bul kún Afrıkanyń burynǵy prezıdentiniń beıbitshilik pen bostandyqqa qosqan úlesin moıyndaý úshin paıda bolǵan.
№11 mekemesindegi SAÁPTJB karantın bóliminiń bastyǵy ádilet leıtenanty Damır Erkeshev kolonıada jazasyn ótep jatqan jasóspirimderge osy kúnniń mán-maǵynasy túsindirilgenin aıtty. Bas bostandyǵynan aıyrylǵan balalar is-shara barysynda «Nelson Mandellaǵa» kúnine arnap sýret salyp, qabyrǵa gazetine ózderiniń júrekjardy tilekterin jazdy.
– Bizde osyndaı is-sharalar josparǵa sáıkes jıi ótkizilip turady. Sol arqyly qazirgi jasóspirimder arasynda quqyq buzýshylyqtyń aldyn alýǵa, qylmystyń ósýine, qatygezdikke jol bermeýge úles qosyp, jastardy adamgershilikke jatpaıtyn nemese ar-namysty qorlaıtyn is-áreketterden aýlaq bolýǵa shaqyryp otyramyz, – deıdi SAÁPTJB bastyǵynyń mindetin ýaqytsha atqarýshy ádilet kapıtany Bekzat Jaqanov.