Áskerı ómirdiń aıbyny sanalatyn Qazaqstan Respýblıkasynyń Ulttyq ulany el ıgiligi men qoǵamdyq qaýipsizdik jolynda 32 jyl qatarynan tabandy túrde qyzmet etip keledi. Qýatty qurylymnyń qatary bıyl da sarbazdarmen tolyǵyp otyr, dep habarlaıdy almaty-akshamy.kz.
Almatynyń qaq tórinen oryn tepken 5571 áskerı bólimine keshe ǵana aıaq basqan jas sarbazdar ant qabyldady. Ulttyq ulannyń general-maıor Talapker Ámireev basqaratyn «Ońtústik» óńirlik qolbasshylyǵyna qarasty 5571 áskerı bóliminiń jas jaýyngerleri maýsymnyń basynan beri Jetigen eldi mekeninde ornalasqan 5574 áskerı bóliminiń oqý ortalyǵynda jas jaýynger kýrsynan ótken bolatyn. Oqý ortalyǵynyń jumysyna 5571 áskerı bólimi komandıriniń orynbasary podpolkovnık Nurlan Súgirálıev basshylyq jasady. 
Ulttyq ulan qataryna elimizdiń barlyq aımaǵynan, bir aı buryn shaqyrylǵan 600-ge jýyq sarbaz az ýaqyttyń ishinde áskerı tártipke úırenip, alǵashqy daıyndyq kezeńinen ótti. Ulttyq ulannyń mindetterimen tanysty. Áskerge ishteı tas-túıin daıyndyqpen kelgen keshegi bozbala búgin sarbaz bolyp, Otanyna adal qyzmet etýge ant berdi. Olardyń qatarynda shyraıly Shymkent shaharynan kelgen jas sarbaz Dımash Beıbitov te boldy. Temirjol salasyndaǵy «Tasymaldaýdy uıymdastyrý» mamandyǵyn meńgergen ol kolej bitirip, dıplom alǵan kúni-aq áskerge attanypty.
– Dımash – uldan kórgen tuńǵysh nemerem bolǵandyqtan, men úshin onyń amandyq-saýlyǵy, Otan aldynda atqarǵan qyzmeti zor mańyzǵa ıe. Sondyqtan da men onyń áskerı ant qabyldaý is-sharasyn kórip, kóńil marqaıtý úshin sonaý Shymkentten arnaıy keldim, – deıdi jas sarbazdarǵa batasyn bergen 60 jastaǵy aqsaqal Beıbit Arysbaev.
Saltanatty rásimnen keıin jas jaýyngerler kelgen qonaqtar men ata-analarǵa bir aı kóleminde úırengen jaýyngerlik urys, qarýmen jáne qarýsyz saptyq tásilderdi oryndaýdan kórinis kórsetti. Sondaı-aq bólimniń áskerı orkestriniń áýelegen plas-konserti men defıle qoıylymdary tamashalandy.
Áskerı ant qabyldaý is-sharasy sońynda jas jaýyngerlerge ata-ana, týystarymen birge qala aralap, serýendep qaıtý múmkindigi berildi. Áskerı bólim basshylyǵynyń sheshimimen, jaýyngerler jospar boıynsha ýaqytyly qalaǵa shyǵyp, belgilengen kezde áskerı bólimge qaıta oraldy.