Almaty zamandyq tehnologıalardy engizýdi jalǵastyryp, jasandy ıntellekti qoǵamdyq qaýipsizdik pen qalalyq ınfraqurylymdy basqarýda kádege jaratyp keledi. JI qoǵamdyq kólikti basqaryp, jol jaǵdaıyn baqylap, tártip buzýshylyqty anyqtap, órtti erte baıqaý sıaqty mindetterdi sheshýge kómektesedi. Óńirlik komýnıkasıalar qyzmetiniń alańynda Almaty qalasy Sıfrlandyrý basqarmasy basshysynyń mindetin atqarýshy Meıram Dúısekov osylaı dedi.
Qaladaǵy negizgi jobanyń biri – Ahýaldyq ortalyq. Munda mashınalyq oqytý men úlken derekterdi taldaý ádisteri qoldanylady. Júıe joldaǵy qozǵalysty saralap, kólik aǵynyn retteýge múmkindik beredi. Sondaı-aq Open Almaty platformasyna túsken ótinishter taldanyp, turǵyndardyń suranysyna sáıkes sheshim qabyldanady.
Jasandy ıntellekt beınemonıtorıng júıesinde de iske qosylǵan. Algorıtmder adamdardyń kóp jınalýyn, kúdikti áreketterdi, tóbelesti, qarýdy, órt pen tútindi anyqtaıdy. Sonymen qatar tártip buzýshylyqtardy belgilep, adamdar men kólikterdi sıpattama boıynsha izdeı alady. Jyl sońyna deıin beıneanalıtıkanyń jańa modýlderi qosylady. Olar ruqsatsyz qoqys tógilgen oryndar men tolyp ketken konteınerlerdi anyqtap, qoǵamdyq kóliktegi beıneaǵyndy taldaıdy.
«Joldardyń jaǵdaıyna da erekshe nazar aýdarylyp otyr. Ótken jyldyń qazan aıynan bastap JI negizindegi monıtorıń júıesi iske asyryldy. Jol jabyny týraly derekter avtobýstar men jedel járdem kólikterine ornatylǵan beınetirkegishter arqyly jınalady», – dedi spıker.
Almaty tájirıbesi kórsetkendeı, jasandy ıntellekt pen sıfrlandyrý – qala ómiriniń mańyzdy bóligine aınalyp keledi.