Almatyda mektep oqýshylaryna arnalǵan jasandy ıntellekt boıynsha bir jyldyq bilim berý baǵdarlamasy bastaldy. Onda memlekettik mektepterdiń 10 myń oqýshysy bilim alyp, baıqaýdan keıin olardyń ishinen 1 myń oqýshy junior-ázirleýshi biliktiligin alady. Baǵdarlamanyń praktıkalyq bóliminde jasandy ıntellektini qoldanyp, 1 myń sıfrlyq ónim jasalady.
«Búgin biz sıfrlyq damýdyń jańa deńgeıine shyqtyq. Almaty jasandy ıntellektini qoldana otyryp, ozyq sheshimderdi engizip, mamandar daıarlaıtyn ortalyqqa aınalyp keledi», – dedi Almaty qalasy Sıfrlandyrý basqarmasy basshysynyń mindetin atqarýshy Meıram Dúısekov.
Jyl sońyna deıin qalada eki jańa bilim berý ortalyǵy ashylady. Birinshisi – TUMO Almaty dep atalatyn, 12–18 jastaǵy jasóspirimderge arnalǵan kreatıvti tehnologıalar ortalyǵy. Ol baǵdarlamalaý men robototehnıkadan bastap, generatıvti jasandy ıntellekt, anımasıa jáne jańa medıaǵa deıingi 15 baǵytty qamtıdy. TUMO ádistemesin qazirdiń ózinde 12 el qoldanýda.
Ekinshi joba – 18 jastan asqan jastarǵa arnalǵan alǵashqy peer-to-peer jasandy ıntellekt mektebi – Tomorrow School. Munda oqý barysyna muǵalim aralaspaı, naqty isti sheshý tájirıbesi qoldanylady. Almatydaǵy jańa sıfrlyq bilim berý ekojúıesiniń irgetasy bolǵaly turǵan bul mektepter bolashaq mamandardy daıarlaýǵa baǵyttalǵan.
Jańa mektepter men startaptarǵa arnalǵan baǵdarlama qalanyń sıfrlyq ekojúıesiniń negizgi elementine aınalyp, zaman talabyna saı mamandardy daıarlaýǵa kómektesedi.
Sonymen qatar, qalada İT jáne startap ekojúıesin damytýǵa arnalǵan úsh jyldyq baǵdarlama iske qosylmaq. Onyń maqsaty – kólik, turǵyn úı-kommýnaldyq sharýashylyq, ekologıa, medısına, qoǵamdyq qaýipsizdik pen bilim berý salalarynda Almatyny jasandy ıntellekt sheshimderin keńinen qoldanatyn pılottyq alańǵa aınaldyrý.
Baǵdarlama aıasynda 300-ge deıin jobaǵa qoldaý kórsetilip, onyń keminde 15-i qalalyq ınfraqurylymǵa engiziledi. 15 memlekettik qurylym jasandy ıntellektpen jumys isteýdi úırenip, sheshimderdi synaýǵa arnalǵan tehnologıalyq quraldar qurylmaq. Jobaǵa 100 mıllıon dollar kóleminde ınvestısıa tartý josparlanyp otyr.