Zań men tártip: Oljas Bektenov Quqyq buzýshylyqtyń aldyn alý jónindegi vedomstvoaralyq komısıanyń otyrysyn ótkizdi
Premer-mınıstr Oljas Bektenov QR Úkimeti janyndaǵy Quqyq buzýshylyqtardyń aldyn alý jónindegi vedomstvoaralyq komısıanyń otyrysyn ótkizdi. Oǵan ishki ister mınıstri Erjan Sádenov, densaýlyq saqtaý mınıstri Aqmaral Álnazarova, oqý-aǵartý mınıstri Ǵanı Beısembaev, mádenıet jáne aqparat mınıstri Aıda Balaeva, sondaı-aq oblystar men Astana, Almaty, Shymkent qalalarynyń ákimderi, Bas prokýratýra, UQK jáne Qarjy monıtorıńi agenttigi ókilderi qatysty.
Otyrysta esirtki qylmysyna, maskúnemdikke qarsy kúres jónindegi sharalar jáne otbasylyq-turmystyq qatynastar salasyndaǵy quqyq buzýshylyqtardyń aldyn alý boıynsha júrgizilip jatqan jumystardyń tıimdiligi jóninde máseleler qaraldy.
İshki ister mınıstri Erjan Sádenov jarty jyl ishinde 6,4 tonna esirtki tárkilengenin, 17 myńnan astam esirtki saıty buǵattalǵanyn, 474 esirtki qylmyskeri, onyń ishinde 28 Telegram-kanal ákimshileri ustalǵanyn baıandady. Uıymdasqan qylmystyq toptarǵa qatysty 21 qylmystyq is qozǵaldy, olardyń úsheýi transulttyq deńgeıdegi toptar.
Esirtkige qarsy 11 myńnan astam is-shara ótkizildi. Sonymen qatar esepti kezeńde qoǵamdyq oryndarda ishimdik ishýdiń 107 myń faktisi jáne alkogól aınalymy salasyndaǵy 7 myń zań buzýshylyqtyń joly kesildi. 11 myń adamǵa spırttik ishimdikterdi paıdalanýǵa tyıym salyndy.
Densaýlyq saqtaý mınıstri Aqmaral Álnazarova aıtqan málimetterge sáıkes, búginde dıspanserlik esepte esirtkige táýeldiligi bar 17 myńnan astam adam tur. Sońǵy bes jylda opıoıdqa táýeldiler sany 1,5 ese azaıǵan, kerisinshe sıntetıkalyq stımýlátorlarǵa jáne esirtkini aralas qoldanýǵa táýeldi bop qalǵan pasıentter sany artqan.
2024 jyldyń sońynan bastap táýeldilik sındromy joq, biraq esirtkini ózine zıandy túrde tutynatyn adamdarǵa konsýltasıalyq baqylaý engizildi. Onymen búginde 3 myńǵa jýyq adam qamtyldy.
Narkologıalyq kómek 20 óńirlik psıhıkalyq densaýlyq ortalyqtarynda, 79 qalalyq jáne 205 aýdandyq kabınetterde kórsetiledi, sondaı-aq Respýblıkalyq ǵylymı-praktıkalyq psıhıkalyq densaýlyq ortalyǵy jumys istep tur.
Medısınalyq-sanıtarlyq alǵashqy kómek deńgeıinde 94 jastardyń densaýlyq ortalyǵy bar, oǵan 2024 jyly 700 myńnan astam adam júgindi. 2025 jyly emdeýdiń tıimdiligin arttyrý boıynsha jańa ádistemelik usynymdar bekitildi. Aýrýhanaǵa jatqyzýǵa qarsy kórsetilimder tizbesin qaıta qaraý jalǵasýda.
Premer-mınıstr quqyq qorǵaý organdarynyń qansha kúsh salyp jatqanyna qaramastan, nashaqorlyq máselesi, ásirese jastar arasynda saqtalyp otyrǵanyn atap ótti.
«El Prezıdenti Qasym-Jomart Toqaev “Zań men tártip” qaǵıdatyn memleket pen qoǵam qyzmetiniń negizgi postýlattarynyń biri retinde aıqyndap berdi. Sondyqtan da memlekettik organdar, sonyń ishinde quqyq qorǵaý organdary Memleket basshysynyń osy nusqaýy sózsiz oryndalýyn birinshi kezekte qamtamasyz etýi mindetti. Búkil qoǵamdy alańdatyp otyrǵan qaýipti tendensıa – jastar arasynda nashaqorlyqtyń taralýy. Ókinishke qaraı, ol kúnnen kúnge beleń alyp barady. Jaǵdaı ony taratýdyń jańa ádisterimen shıelenise túsýde, olar – ınternet arqyly, poshta arqyly, “jasyryp ketý”, ıesi belgisiz elektrondy tólemder. Munyń barlyǵy “narkodıller-ótkizýshi-tutynýshy” úshtiginde fızıkalyq baılanystyń bolmaýyna ákelip otyr. Sol sebepti de qazir taratýshylardy ustaý áldeqaıda qıyn», — dep atap ótti Oljas Bektenov.