Shchuchınsk qalasynda tehnıkalyq jáne kásíptík bílím beru ūıymdarynyń studentterí arasynda Respublıkalyq jastar sletí óz jūmysyn bastady. Elímízdíń túkpír-túkpírínen kelgen 100-den astam belsendí jas jūmysshy mamandyqtarynyń keleshegín talqylap, kásíbı sheberlíkterín shyńdauǵa jáne jańa serpín aluǵa jınaldy.
Ís-sharanyń saltanatty ashyluyna QR Premer-mınıstríníń orynbasary Ermek Kósherbaev, Oqu-aǵartu mınıstrí Ǵanı Beısembaev, Aqmola oblysynyń ákímí Marat Ahmetjanov, QR Parlamentí Májílísíníń deputattary jáne bírqatar memlekettík organdardyń ókílderí qatysty.
Premer-mınıstrdíń orynbasary Ermek Kósherbaev slet qatysushylaryn qūttyqtap, jūmysshy mamandyqtarynyń el damuyndaǵy mańyzyn atap óttí:
"Memleket basshysy 2025 jyldy Jūmysshy mamandyqtary jyly dep jarıyalady. Būl – tek belgílí bír sala boıynsha mamandar dayarlau emes, jalpy eńbekke degen kózqarasty qaıta qarau qajettígín bíldíredí.
Ūzaq jyldar boıy qoǵamda jūmysshy kásípteríne qatysty terís kózqaras qalyptasyp keldí. Alaıda búgíngí kúní jaǵdaı ózgerdí. Qazírgí zamannyń jūmysshysy – jańa tehnologıyalardy meńgergen, eńbek naryǵynda joǵary sūranysqa ıe kásíbı maman.
Bíz, memleket retínde, eńbektí qadírleu mádenıetín qaıta jańǵyrtyp, jūmysshy eńbegíne laıyqty qūrmet qaıtaruǵa bar kúshímízdí salyp otyrmyz. Óıtkení ındustrıyalyq damu, óndírístíń jańǵyruy men ekonomıkalyq tūraqtylyq — bárí sízderdíń qajyrly eńbekteríńízge baılanysty. Osy ózgerísterdíń aldyńǵy shebínde – sízder, jas mamandar tūrsyzdar", – dedí Ermek Kósherbaev.