Elimizde Dombyrashylar odaǵy quryldy
«Dombyrashylar odaǵy» respýblıkalyq qoǵamdyq birlestigi bıyl 10 tamyz kúni qurylǵan. Qoǵamdyq birlestiktiń maqsaty – ulttyq ónerimizdi keńinen dáriptep, jastardyń dástúrli ónerimizge qyzyǵýshylyǵyn oıatyp, ulttyq qundylyǵymyzdy damytý jolynda eńbek etý. Jas ónerpazdardyń shyǵarmashylyǵynyń órkendeýine kómek kórsetý. Túrli baıqaýlar, baǵdarlamalar, konsertter uıymdastyrý, dep habarlaıdy Almaty-akshamy.kz
Dástúrli ánshi, Qazaqstannyń eńbek sińirgen ártisi, «Qurmet» ordeniniń ıegeri Ramazan Stamǵazıev mundaı odaqty qurý jónindegi bastamalar burynnan kóterilip kelgenin aıtty.
«Ulttyq ónerimizdiń qamytyn kıip, sonyń kókparynda júrgen aldyńǵy jáne ortańǵy býyn ónerpazdardyń qanshama aıtatyn, kórsetetin dúnıesi halyqqa jetpeı qalyp jatyr. Búginde elimizde Dombyrashylar odaǵy quryldy, endi barlyq óner adamdary múshelikke ótse, alǵa qoıǵan úlken sharýalarymyzdy júzege asyramyz. Sondaı-aq ánshilerdiń shyǵarmashylyq keshteri, ǵylymı eńbekteri men jazbalaryn osy odaq aryly jınastyryp, oı eleginen ótkizip, iske asyrsaq dep otyrmyz. Osy atqarylǵan sharýalardy Dombyra telearnasy arqyly halyqqa jetkizsek dep maqsat tutyp otyrmyz», - deıdi ánshi.
«Dombyrashylar odaǵy» respýblıkalyq qoǵamdyq birlestiginiń basshysy Qanat Erjigitov ulttyq ónerdi keńinen nasıhattaý úshin Dombyra telearnasyn «Otaý-TV» spýtnıktik jelisine qosý qajettigin aıtty.
«Dástúrli ónerdi tyńdaýshy kórermenimiz aýylda turady. Elimizde 5 myń aýyl bar, olardyń barlyǵy osy spýtnık jelisine qosylǵan. Qazir respýblıka dárejesindegi ánshilerdiń basyn biriktirip otyrmyz, endi múshelerdiń atynan Memleket basshysyna hat jazsaq, «Otaý-TV» spýtnık jelisine qosylamyz degen senimdemiz. Alǵa qoıǵan basqa da josparymyz kóp», - dedi Qanat Erjigitov.
Dástúrli ánshi, eńbek sińirgen qaıratker Sáýle Janpeıisova Dombyrashylar odaǵy kúıshilerdiń ǵana emes, qolyna dombyra ustaǵan barlyq óner adamyna ortaq ekenin aıtady.
«Elimizde jazýshylar, sýretshiler, jyrshylar, kúıshiler jáne taǵy basqa óner adamdarynyń odaqtary bar. Jyl saıyn 1 shilde - Dombyra kúni dep atalyp ótedi. Sol kezde dombyramen án aıtyp júrgen ánshiler shet qalyp, aldyǵa kúıshiler shyǵatyn. Qazir ol jaǵdaı retteldi, ol kezde biz de óner kórsetetin boldyq. Bizge qaı salada bolmasyn birlik kerek, onsyz eshteńeni tyndyra almaıtynymyzǵa kózimiz jetti. Ortaq máselelerdi birge taldap, birge sheshý úshin odaqtyń paıdasy zor», - dedi Sáýle Janpeıisova.