Elimizde jyl saıyn júz myńǵa jýyq jup shańyraq kóteredi
Otbasy kúnin merekeleý qarsańynda jáne el Táýelsizdiginiń 30 jyldyǵyna oraı «Báıterek» monýmentinde 7 jas jubaıdyń neke qıý rásimi ótti, dep habarlaıdy Almaty-akshamy.kz.
Saltanatty sharaǵa QR Aqparat jáne qoǵamdyq damý vıse-mınıstri Asqar Omarov pen Esil aýdanynyń ákimi Berik Jákenov qatysty.
«2013 jyldan bastap Tuńǵysh Prezıdent – Elbasy Nursultan Ábishuly Nazarbaevtyń bastamasy boıynsha qyrkúıektiń ár ekinshi jeksenbisinde Otbasy kúni merekelenedi. Qazaqstanda otbasyn damytý men qoldaýǵa memleket kóp kóńil bóledi. Jyl saıyn Qazaqstanda 100 myńǵa jýyq jup neke qurady. Ótken jyldyń ózinde Nur-Sultanda 10 500-den astam neke qıyldy. Shańyraq kóterip otyrǵan jastardyń uzaq ómir súrip, kópbalaly, baqytty ata-ana bolýyn tileımin. Memleket sizderdi qoldaýǵa árdaıym daıyn», – dedi Asqar Omarov.
Sarapshylardyń aıtýynsha, elordada tirkelgen nekeler sany únemi ósip keledi, al jastar otbasyn qurý máselesine sanaly túrde qaraıdy.
«Qazir shańyraq kóteretinder qatary artyp keledi. Bul óte qýantarlyq jaıt. 2019 jylmen salystyrǵanda, bizde neke qıý kórsetkishi 3 myńǵa artty. Bul jastardyń otbasyn qurýǵa sanaly túrde qaraı bastaǵanyn bildiredi. Qýantarlyǵy, olardyń jasy búginde 25-28 jasty quraıdy, bul olardyń bilim alyp, turaqty jumysy bolatyn kez», – dep atap ótti Esil aýdany ákimdigi apparatynyń AHAT bóliminiń basshysy Raýshan Zarırova.
Aıta keteıik, is-shara sanıtarlyq normalardy saqtaı otyryp ótkizildi. Jyl saıyn Otbasy kúnine oraı Nur-Sultannyń barlyq aýdanynda birinshi kezekte otbasy statýsyn arttyrýǵa, otbasylyq qundylyqtar men dástúrlerdi nasıhattaýǵa, jastardyń boıynda jaýapkershilik sezimin tárbıeleýge baǵyttalǵan estelik is-sharalar ótkiziledi.
Osy kúndi merekeleý aıasynda Qazaqstanda QR Tuńǵysh Prezıdenti Nursultan Nazarbaevtyń bastamasymen segiz jyl boıy «Mereıli otbasy» ulttyq konkýrsy ótkizilip keledi. Ol óńirlik jáne respýblıkalyq deńgeılerdegi birneshe kezeńnen turady. Osy jyldyń ózinde elordada oǵan qatysýǵa 120 otbasy ótinim berdi, onyń ishinde eńbek áýletteri, kóp balaly otbasylar, kásipkerler, ártúrli salalarda joǵary jetistikteri bar sportshylar jáne t.b.