Mereke kúnderi megapolıste 4 myńǵa jýyq tártip saqshysy qyzmet etpek.
Jańa jyl qarsańynda Almaty qalasynyń tártip saqshylary kúsheıtilgen rejımde jumys isteýge kóshti, dep habarlaıdy Almaty-akshamy.kz Almaty.tv-ge silteme jasap.
Bul - shahar turǵyndary men qonaqtarynyń qaýipsizdigi úshin jasalǵan sharýa. Mereke kúnderi megapolıste 4 myńǵa jýyq tártip saqshysy qyzmet etpek. Olar 5 qańtarǵa deıin merekelik is-sharalar bolatyn kóshelerdi, jalpy, qaladaǵy tynyshtyqty baqylamaq.
Meırambek Tileýbergenovtiń polısıa salasynda qyzmet etip kele jatqanyna bıyl 17 jyl. Óz kásibin shyn súıetin tártip saqshysynyń jańa jyldy otbasymen birge qarsy alǵan kezi esinde joq. Óıtkeni bul kúnderi Almaly aýdandyq polısıa basqarmasynyń jeke quramy da kúsheıtilgen rejımge aýysady, jumys eki esege kóbeıedi. Tártip saqshylary qoldan kelgenshe zań buzylmaýyn qadaǵalaıdy. Polısıa departamenti qazir úsh aýysymda kúni-túni úzdiksiz jumys isteıdi. Bul halyq úshin jasalyp otyr.
«Barlyq halyq demalady. Basqa oblystardan Jańa jylǵa, qonaqqa keletinder bar. Bizde qalada rejım kúsheıedi. Nege? Óıtkeni, qylmystyń, ákimshilik jaýapkershiliktiń aldyn alý úshin. Jańaǵy qydyryp kelip jatqan, demalyp júrgen azamattardyń tynyshtyǵy úshin, sondaı-aq Jańa jyl qarsańynda mereke shyrqyn buzbaý úshin tártip qatań saqtalýy kerek», – dedi Almaly aýdandyq PB aǵa ınspektory Meırambek Tileýbergenov.
Meıram kúnderi joldaǵy qaýipsizdikke asa mán berilmek. Óıtkeni ashshy sýdy urttap alyp kólik tizgindeıtinder jáne asa joǵary jyldamdyqpen keshki jarys ótkizetinderdiń qatary artatyn kórinedi. Olarǵa tártip saqshylary reıd júrgizip, óreskel qatelikterdi boldyrmaýǵa atsalysady.
«Jańa jylda kóbine otbasylyq-turmystyq qylmys jıi tirkeledi. Iaǵnı tóbeles, janjal, usaq buzaqylyqtar. Sońǵy jyldary aýyr jáne asa aýyr qylmystar tirkelgeni este joq. Ásirese, mereke kezinde múlik jáne qalta urlyǵy, adamdardy aldaý jaǵdaıy kóp kezdesedi. Ońaı jolmen olja tapqysy keletinder merekege daıyndyqty paıdalanyp telefon, aqshany úptep ketedi», – dedi polısıa departamentiniń resmı ókili Saltanat Ázirbek.
Jańa jyl merekesi halyq úshin demalys bolsa, al polıseıler úshin qyzý jumys. Tártip saqshylarynyń basym bóligi bul túndi qyzmet babynda qarsy alady. Olar halyqty zań talaptaryn qatań saqtaýǵa shaqyrady.