Almatynyń Balýan Sholaq atyndaǵy sport jáne mádenıet saraıynda shahmattyń rapıd jáne blıs túrinen álem chempıonatynyń jabylý saltanaty ótti.
Saltanatty rásimde Almaty ákimi Erbolat Dosaev jarys jeńimpazdaryn quttyqtap, halyqaralyq shahmat federasıasyna alǵys aıtty.
«Álemdik dodany uıymdastyrǵany úshin FIDE halyqaralyq shahmat federasıasyna, Qazaqstan shahmat federasıasyna, sondaı-aq barlyq seriktesterge úlken alǵysymdy bildiremin. Barlyq qatysýshylardy, ásirese, bedeldi halyqaralyq týrnırdiń jeńimpazdaryn quttyqtaımyn! Bizdiń ádemi qalamyzda álem chempıonatynyń ótýi jáne álemniń kil myqtylaryn jınaıtyn ortalyqqa aınalýy biz úshin úlken mártebe boldy. Almaty shahmat týrnırlerin ótkizý úshin turaqty orynǵa aınalady dep senemin. Men chempıonatty muqıat qadaǵalap, jankúıerlerdiń qatarynda boldym. Jańa jyl qarsańynda barshańyzǵa zor densaýlyq, beıbitshilik, amandyq jáne jańa bıikter tileımin. Bizdiń qonaqjaı jáne ádemi qalamyz sizdiń júregińizde qalatynyna senimdimin», – dedi qala basshysy.
Aıta ketken jón, jahandyq dodaǵa 50 eldiń úzdik 290 shahmatshysy qatysty. 26-28 jeltoqsan aralyǵynda rapıd oıyndary, 29-30 jeltoqsan kúnderi blıs oıyndary ótti. Sondaı-aq, jarys kúnderi tóreshiler korpýsyna arnalǵan FIDE semınarlary, balalar men barlyq áýesqoıǵa arnalǵan bir mezgilde oıyn seanstary men blıster, IT saladaǵy baǵdarlamashylar úshin jeke týrnır uıymdastyryldy.
Rapıdten erler arasynda jarys favorıti norvegıalyq Magnýs Karlsen jeńiske jetip, tórtinshi ret chempıon boldy. Ol buǵan deıin 2014, 2015, 2019 jyldary jyldam shahmattan álem chempıony atanǵan.
«Meni toqtatatyn adam shyqqan kezde ǵana men mansabymdy aıaqtaımyn. Jalpy, týrnır deńgeıi óte joǵary. Jeńiske jetý ońaı bolǵan joq», – dep óz jeńisinen keıin Magnýs Karlsen pikir bildirdi.
Aıtylǵan jarys túrinen 2-oryn 18 jastaǵy nemis grosmeısteri Vınsent Keımerge buıyrdy. Al 3-orynǵa amerıkalyq shahmatshy Fabıano Karýana jaıǵasty.
Al áıelder arasyndaǵy jyldam shahmatta otandasymyz Dınara Sádýaqasova sheber óner kórsetip, álem chempıonatynyń kúmis júldesine ıe boldy. Bas júlde qytaılyq Tan Chjýnıge, al qola medal Úndistan shahmatshysy Shrı Savıtege buıyrdy.
Blıs jarysy da Qazaqstan quramasy úshin jeńisti boldy. Bıbisara Asaýbaeva blısten óziniń chempıondyq ataǵyn qorǵap, altynnan alqa taqty. Ekinshi jáne úshinshi oryndarǵa úndistandyq Hampı Konerý jáne Polına Shývalova (FIDE) jaıǵasty.
“Men úlken jaýapkershilikti sezindim. Jeńiske jetkenime qýanyshtymyn. Dál osyndaı jetistikke Qazaqstanda jetkenim qýanyshty tipti eseleıdi”, - dedi B.Asaýbaeva.
Erler arasyndaǵy blıste taǵy da Magnýs Karlsenge teń kelgender bolǵan joq. Ol Almaty ótken álem chempıonatynda qos altyn qanjyǵylady. Atalmysh jarys túrinen jeńis tuǵyrynyń ekinshi satysyna amerıkalyq Hıkarý Nakamýra shyqty. Úzdik úshtikti armenıalyq Haık Martırosán túıindedi.
Týrnırdiń uıymdastyrýshylary - FIDE jáne Qazaqstan shahmat federasıasy. Chempıonat Almaty qalasy ákimdiginiń jáne Qazaqstan Respýblıkasy Mádenıet jáne sport mınıstrliginiń qoldaýymen ótkizildi.