Instagram arqyly telefon satamyz dep qazaqstandyqtardy san soqtyrǵan kúdiktiler ustaldy.
18-20 sáýir aralyǵynda Atyraý oblysynyń aýmaǵynda “Anti-fraud” jedel-profılaktıkalyq is-sharasy ótip jatyr. Jedel-profılaktıkalyq is-shara barysynda Atyraý oblysy polısıa departamenti jáne Taldyqorǵan qalalyq polısıa basqarmasy kıberqylmysqa qarsy kúres kyzmetkerleri birlesip qylmystyq topty anyqtap, ustady, dep habarlaıdy Almaty-akshamy.kz.
Kúdiktiler áleýmettik jeli arqyly jalǵan paraqsha ashyp, Iphone telefonyn saýdalap, alaıaqtyq áreketimen aınalysqan. Naryqtaǵy baǵadan arzan smartfon alamyn degen turǵyndar aqshasynan ońaı aıyrylyp qalǵan. Al alaıaqtar aqshalardy qolma-qol shyǵarý arqyly dropperlerge aýdaryp, keıin ózderiniń esepshottaryna aýdaryp otyrǵan.
Jábirlenýshiler arasynda Semeı qalasy, Almaty, Astana qalasy, Qaraǵandy, Aqtóbe, Aqtaý qalasy, Ulytaý, Óskemen qalasy, Shymkent, Oral qalasy, Pavlodar oblystarynyń turǵyndary bar. Ustalǵan 18 jastaǵy jáne 56 jastaǵy kúdiktiler Almaty qalasynyń turǵyndary ekeni anyqtaldy. Tekserý kezinde eki IPhone 14 jáne IPhone 12, IPhone 6s , Samsung, noýtbýk, 12 SIM-karta, Beeline modemi, túbirtekter tárkilendi.
Keltirilgen shyǵyn kólemi 2 mln teńgege jýyq ekeni anyqtaldy. Qazirgi ýaqytta kúdiktilerge qatysty QR QK-niń 190-baptyń 3-bóligi boıynsha tergeý amaldary júrgizilip jatyr. Ózge aqparat QPK-niń 201-babyna sáıkes jarıalanýǵa jatpaıdy.