nemese pitir-sadaqa berip úlgerdińiz be?
Qazaqstan Musylmandary dinı basqarmasy bıylǵy pitir-sadaqanyń mólsherin 2 keli unnyń naryqtaǵy ortasha baǵasymen eseptep, 535 teńge bolyp bekitilgenin buǵan deıin habarlaǵan bolatyn. Iá, qazir bıdaıdyń ózi emes, onyń un, talqan sekildi ónimderi keńirek qoldanylady. Sol sebepti dinı basqarma pitir-sadaqanyń qunyn unmen esepteýdi negizge alǵan bolatyn. Óıtkeni, sharıǵatta bıdaımen qatar onyń ónimderimen de pitir-sadaqa berýge ruqsat etilgen. Mine, Ramazan aıy da aıaqtaldy. Pitir-sadaqańyzdy berip úlgerdińiz be?
Aıda ARALBAIQYZY, tárbıeshi: Óz týysyńnan basta
Otaǵasymnyń jezdesiniń jaqyn týysynyń kishkentaı balasy aýrýshań edi, sol balanyń emine qarajat jınap jatyr eken. Týysqandardyń ortaq chatyna «Ramazan aıyndaǵy pitir-sadaqamyzdy sol kisige jınap bersek» degen ótinish túsken-di. Biraýyzdan sol otbasyna aýdardyq. Sharıǵatta da aıtylǵan ǵoı, sadaqany jaǵdaıy tómen óz týǵan-týystaryńyzdan basta dep. Paıǵambarymyzdyń bir hadısinde «Sadaqany týysyna bergen adamǵa eki saýap bar: biri – týystyq saýaby, ekinshisi – sadaqa saýaby» delingen eken. «Tamshydan – teńiz» degendeı, dimkás bala aıaqtan turyp ketip jatsa, odan asqan saýap bolmas biz úshin!
Aınur NURJAN, kásipker: Sadaqa berý – shúkirlik etý
Iá, ár musylmannyń paryzy bolyp sanalatyn pitir-sadaqany bıyl da berdik. Otbasylyq shaǵyn bıznesimiz bar. Jumyskerlerimizdiń deni ata-anasynan, otbasynan jyraqta júrgen dıplomsyz jastar, oqýda júrgen stýdentter. Kúıeýim bıylǵy pitir-sadaqany sol jastarǵa artyǵymen taratyp berdi. Jalpy, sadaqa berý – shúkirlik etý. Allanyń bizge bergen nyǵmetin seziný dep bilemin óz basym.
Arsen SATYBAI, taksı júrgizýshisi: Ulymmen birge bardym
Men juma namazynan qalmaı, meshitke baratyn musylmandardyń birimin. Shyny kerek, keıde meshit aldyna kóligińdi qoıatyn oryn tappaı qınalsań da, «Alla úıiniń aldynda turmyn ǵoı» dep ózińdi ashýǵa boı aldyrmaýǵa, sabyrǵa shaqyrasyń. Islamnyń ózi adamdy tárbıeleıtin úlken qural ǵoı túsine bilgen adamǵa. Pitir-sadaqamdy meshit jáshigine aparyp saldym. Jáne sol kúni janyma kishkentaı ulymdy ertip aldym. Sadaqanyń ne ekenin, mán-mańyzyn uqsyn, sezinsin dep. Balalar meıirimdi, qaıyrymdy bolyp ósse, qarttyǵymyzǵa alańdaýǵa esh negiz joq dep bilemin.
Talshyn ALANQYZY, kókónis satýshy: Bastysy – senim
Shyny kerek, «áne berem, mine berem» dep júrip, pitir-sadaqamdy keshe ǵana saldym. Qazir bank qosymshasynan da ashyp qoıǵan ǵoı, qolyńyzdaǵy uıaly telefonmen qaı túkpirde júrseńiz de, qalaǵan meshitińizge aýdara qoıasyz. Eń bastysy – pitir-sadaqamdy adal eńbegimmen tapqan qarajatymnan aýdardym. Ótkende áleýmettik jelide bir ımamnyń meshit aldynda turyp, ótken-ketken aǵaıynǵa pitir-sadaqa týraly qulaǵdar etip turǵan vıdeosy tarady. Ony keıbirimiz munysy nesi dep synap jattyq. Menińshe, oraza aıynyń aıaqtalyp qalǵanyn, pitir-sadaqasyn berip úlgermegenderge qulaqqaǵys etip turǵan bolar, onda turǵan esh sókettik joq dep oılaımyn. Sadaqa bizdi tosyn apattardan, aýrý-syrqaýdan, jamandyq ataýlydan saqtaıdy dep senemin. Bastysy – senim.
Sársenbaı ASQATTEGİ, ustaz: Kórshige qaraılastyq
Kórshim neshe jyldan beri dimkás bala baǵyp otyr. Ózi jalǵyzilikti áıel. Bala kúnnen-kúnge ósip aýyrlap barady, sonda da qaıran sheshe balasyn qolarbaǵa kóterip alyp otyrǵyzyp, kóterip-túsirip jatady. «Alla synaǵyn kótere alatyn adamǵa beredi» degen sóz ras-aý dep qalamyn keıde. Mektep-ınternatqa ótkizýge qımaıdy eken, áıelime aıtyp jylap alatyn kórinedi keıde. Alladan da qorqatyn shyǵar, kim bilgen. Pitir-sadaqamyzdy kórshiler bolyp sol áıelge jınap berdik. Jumystaǵy biraz áriptesime de aıtyp, olar da esepshotyna aýdardy. Qýanyp qalypty. Jaı kúnderi de kelinshegim tátti, dámdisin, jańa kıimder aparyp berip júredi. Oǵan qýanbasam, renjimeımin.
Jamal JUMAǴALIQYZY, jýrnalıs: Balalardy qýanttyq
Biz ujymdaǵy eden jýatyn, úsh balasy bar jesir anaǵa jınap berdik pitir-sadaqamyzdy. Árıne, basynda baspanasy, jumysy bar áıel ǵoı. Degenmen, balalarynyń aldy 18-de eken. Qatarynan qalmaı jaqsy kıingisi keledi degendeı qazirgi bala. Biz sóıtip kúndelikti janymyzda júrgen áıel-anany, jelkildep ósip kele jatqan balalaryn qýantqymyz keldi. Bar nıetimiz sol. Keshe suracam, «úsheýine de ózderi qalaǵan kıimderin alyp berdim» dep qýanyp tur. Bala – perishte, al perishte qýansa, álem de qýanyp tur degen sóz.
Árıne, sadaqa bergendi jasyryp ustaý, mindetsinbeý kerek degen bar. Degenmen, sizdiń saýalyńyzǵa oraı, ári pitir-sadaqany shyn yqylaspen usynǵanymyzdy jetkizgim kelip turǵany. Onyń ústine, qaıyrymdylyq qadamdary jas urpaqqa úlgi bolýy kerek.
Taqyrypqa oraı
SADAQA BERÝ:
– rızyq-nesibeńizdi arttyryp, tabysqa jeteleıdi,
– kúnálardy joıady;
– aýrý men keler apattan qorǵaıdy;
– muqtajdardy qýanyshqa bóleıdi;
– qabir azabynan saqtaıdy.