Búgin Almaty ákimi Bostandyq aýdany turǵyndarymen kezdesti.
Jıynda qala turǵyndary ózderin tolǵandyrǵan saýaldaryn qala basshylyǵyna qoıdy, dep habarlaıdy Almaty-akshamy.kz.
Turǵynnyń suraǵy:
- Esentaı ózenin tazalaý jáne abattandyrý qashan júrgiziledi?
Bostandyq aýdanynyń ákimi Altaı Rahymbetovtyń jaýaby:
- Esentaı ózeni ótken jyldyń qazan aıynda ǵana qala balansyna berildi, buryn ol "Qazseldenqorǵaý" balansynda bolǵan. Qazan aıynda birden ekologıa jáne qorshaǵan ortany qorǵaý basqarmasy tıisti ótinim berdi.
Almaty qalasy ekologıa jáne qorshaǵan ortany qorǵaý basqarmasynyń basshysy Serik Ádilbaevtyń jaýaby:
- Bıyl Esentaı jáne Úlken Almaty ózenderiniń túbine tazartý júrgiziledi. Merdiger anyqtaldy, kelesi aptada jumys bastalady.
Almaty qalasynyń ákimi Erbolat Dosaevtyń jaýaby:
- ál-Farabıden joǵary Esentaı boıynsha aýmaq abattandyrylǵan, al ál-Farabıden tómen jaǵy sol boıynda qalǵan. Endi biz ózendi Abaı dańǵylyna deıin abattandyrý jobasyn daıyndap jatyrmyz, sondyqtan qalanyń tómengi bóliginiń turǵyndary joǵarǵy bóligindeı ózderin jaıly sezinetin bolady.
Úlken Almaty ózeniniń jaǵalaýy Tuńǵysh Prezıdent saıabaǵynan bastap Saıranǵa deıin tolyq abattandyrylady, jalpy uzyndyǵy - 7,1 km. Ótken jyly qujattardy daıyndaýǵa bir jylǵa jýyq ýaqyt ketti. Qazir qujattar bar, konkýrstyq rásimder júrgizilýde, búdjetten aqsha qarastyrylýda. Jumys bastaldy. Mysaly, ózderińiz bisizder, Saıran kóli 50 jyldan astam ýaqyt boıy tazartylmaǵan. Biz bıyl ony alǵash ret tazartyp, rekonstrýksıa júrgizetin bolamyz.