Almatylyq epıdemıologtar qaýipti indettiń birshama tómendegenin atap ótti. Biraq olar bosańsymaýǵa shaqyryp, vaksına alýdy kúsheıtý kerektigin eskertti
Qalalyq sanıtarlyq-epıdemıologıalyq baqylaý departamenti basshysynyń orynbasary Ásel Qalyqova Óńirlik komýnıkasıalar qyzmetinde ótken brıfıńte vırýstyń áli joıylmaıtynyn, kún saıyn 420-dan astam jańa juqtyrýshylardyń tirkeletinin basa aıtty, dep habarlaıdy Almaty-akshamy.kz.
Á.Qalyqovanyń aıtýynsha, Almatydaǵy qazirgi jaǵdaı pesımısik boljamǵa sáıkes keledi. Mysaly, sońǵy táýlikte koronavırýs ınfeksıasyn juqtyrǵan 426 jaǵdaı tirkeldi. Al epıdemıologıalyq jaǵdaıdy baǵalaý matrısasynda qala «qyzyl aımaqta» tur.
"COVID–19 qozdyrǵyshynyń "delta" patogendiliginiń tómendeý úrdisi baıqaldy. Buǵan "sımptomdyq" naýqastardyń úles salmaǵynyń qyrkúıektiń basyndaǵy 96%-dan 27 qyrkúıekke 92%-ǵa deıin tómendeýi dálel. Qazan aıynda KVI juqtyrýshylardyń sany táýligine 40-tan 100-ge deıingi aralyqty kórsetip, osylaısha tómendeýi múmkin dep boljanýda", – dep habarlady sanıtarlyq-epıdemıologıalyq vedomstvo basshysynyń orynbasary.
Bul rette shahardaǵy qazirgi epıdemıologıalyq jaǵdaı boıynsha qala turǵyndarynyń ımýndyq deńgeıi 50%-ǵa jetti. Resmı málimet boıynsha halyqtyń 43%-y vaksınanyń ekinshi komponentin alsa, + 7%-y jyl basynan beri saýyǵyp ketkender.
Á. Qalyqova almatylyqtardyń bosańsýǵa bolmaıtynyn atap ótti. Óıtkeni qaýip tolyǵymen seıilgen joq. Koronavırýstyń jańa nusqalary taralýda.
«COVID-19 aýrýynyń platoǵa jetýi pandemıa aıaqtaldy degendi bildirmeıdi. Búginde ınfeksıalyq prosesti toqtatýdyń eń tikeleı ári jyldam tásili – tek vaksınalaý», – dep qorytyndylady sózin Á. Qalyqova.
Aıta ketsek, ótken táýlikte Almatyda 2324 adamǵa birinshi komponent, 4636 adam ekinshi komponentti ekti. Barlyǵy 2021 jyldyń 1 aqpanynan 28 qyrkúıegine deıin 948 526 adam birinshi komponentti, 851 423 adam ekinshi komponentti aldy. Vaksınalanǵandardyń ishinde 60 jastan asqan adamdar 117 969 adamǵa jetti.
Eske salsaq, qalada medısınalyq uıymdarda, mektep, mádenıet jáne sport nysandarynda, bazar men saýda oıyn-saýyq ortalyqtarynda 160 ekpe pýnkti jumys isteıdi.