Sport bapkerleriniń aılyǵy kóteriledi
Qazaqstan boks federasıasynyń bapkerlik máseleler jónindegi vıse-prezıdenti, memlekettik jattyqtyrýshy Baqtıar Artaev boksshylardyń Tokıo Olımpıadasyndaǵy sátsizdikteri úshin keshirim surady, dep habarlaıdy Almaty-akshamy.kz QazAqparat saıtyna silteme jasap.
«Árıne, Tokıo Olımpıadasynda óte sátsiz bolǵan kórsetkishimiz úshin keshirim suraımyz. Aldaǵy ýaqytta saraptama, júıeli jumys jasalyp, kelesi Olımpıada oıyndarynda ózimizdiń burynǵy kórsetkishterimizge qaıta oralyp, joǵary nátıje kórsetemiz dep sendirgim keledi. Qoldaýlaryńyzǵa kóp rahmet. Ári qaraı júıeli jumys jasap, sporttyq nátıjelerimizdi kóteremiz. Eshqandaı suraq joq, rahmet aıtqym keledi», - dedi Baqtıar Artaev Qazaqstan Ulttyq Olımpıada komıteti Bas assambleıasynyń otyrysynda.
Aıta keteıik, atalmysh sharada Premer-Mınıstrdiń orynbasary Eraly Toǵjanov Mádenıet jáne sport mınıstrligine sport bapkerleriniń aılyǵyn kóterý týraly tapsyrma berdi.
«Ulttyq Olımpıada komıteti Mádenıet jáne sport mınıstrligimen, Bilim jáne ǵylym mınıstrligimen birlesip, joǵary oqý oryndarynda jańa bilim baǵdarlamalaryn daıyndaýǵa atsalysýy kerek. Sondaı-aq, mınıstrlikke bapkerlerdi qoldaý, onyń ishinde eńbekaqysyn kóterý boıynsha usynys daıyndaý kerek. Tórtinshiden, aldaǵy Beıjiń qalasynda ótetin qysqy Olımpıada oıyndarynda sportshylarymyzdyń tabysty óner kórsetýin qamtamasyz etý qajet. Bul máseleni jýyqta Úkimette talqylaǵanbyz. Federasıa basshylarymen bul jóninde jeke kezdesý ótkizemiz», - dedi vıse-premer.