Eger kólik ıesi qaıtys bolyp, muragerlik rásimder áli aıaqtalmasa, kólikti júrgizýge bola ma? Sarapshylar bul jaǵdaıdy zań turǵysynan túsindirip berdi, - dep habarlaıdy Aqshamnews.kz tilshisi.
Birinshiden, “Jol júrisi týraly” zań kólik ıeleriniń quqyqtary men mindetterin anyqtaıdy. Bul zańnyń 54-babyna sáıkes, júrgizýshi árqashan ózimen birge júrgizýshi kýáligi, kólik quralyn tirkeý týraly kýálik (SRTS) jáne menshik quqyǵyn rastaıtyn qujatty alyp júrýge tıis.
Sonymen qatar, osy baptyń 4-tarmaǵyna saı, ıesi mindetti saqtandyrý kelisimin jasamaǵan kólikti júrgizýge tyıym salynady. Al saqtandyrý polısin rásimdeý úshin kólikke zańdy ıelik etý dáleli qajet. Eger kólik ıesi tiri bolsa, ol ruqsatyn aýyzsha da bere alady.
Biraq ıesi qaıtys bolǵan jaǵdaıda mundaı erik bildirý múmkin emes. Sol sebepti senimhattardyń da kúshi joıylady (QR Azamattyq kodeksiniń 170-baby). Mundaı kezde notarıýs mura ashylǵan jer boıynsha senimgerlik basqarýshy taǵaıyndaıdy. Ol muragerlik múlikti basqaryp, kólikke mindetti saqtandyrý kelisimin jasaı alady. Bul rette sizdi saqtandyrylǵan tulǵa retinde belgileı alady.
Saqtandyrý polısi kóliktiń ózine jáne júrgizýshige baılanysty rásimdeledi, sondyqtan ıesi keıin ózgergenniń ózinde polıs óz kúshin joǵaltpaıdy. Ol tek merzimi bitkende nemese kelisim merziminen buryn toqtatylǵanda kúshin joıady.
Ekinshiden, eger siz saqtandyrýdy kólik ıesi tiri kezinde óz atyńyzǵa rásimdetken bolsańyz, ol polıs te jaramdy bolyp qala beredi. Bul jaǵdaıda SRTS marqumnyń atyna tirkelgenimen, kólikke ıelik etý quqyǵyn dáleldeıtin satý-satyp alý sharty bar bolsa, kólikti paıdalanýǵa zań boıynsha ruqsat etiledi.
Alaıda munda bir mańyzdy qaýip bar: eger kólikti murager anyqtalmaı turyp marqumnyń týystarynyń biri arqyly satyp alsańyz, keıin resmı murager basqa adam bolyp shyǵýy múmkin. Bul jaǵdaıda sizdiń mámileńiz zańsyz dep tanylýy yqtımal.
Sondyqtan mamandar kólik qujattaryn muqıat tekserip, muragerlik is ashylǵan notarıýsqa júginýdi usynady.