Nazym Qyzaıbaıdyń sporttaǵy jetístíkterí – qazírgí zamanǵy sport pen qoǵam úshín mańyzdy kórínís. Onyń jastarǵa úlgí bolyp, qajyrly eńbek, temírdeı tártíptíń arqasynda maqsatqa jetuge bolatynyn dáleldeıdí. Nazymnyń jeńísteríníń artynda kúndelíktí jattyǵu men úlken jíger jatyr. Būl qasıetter kez kelgen jas sportshy úshín úlgí bolyp tabylady.
Búgín №110 mektep-gımnazıyasynda el sportynyń abyroıyn asqaqtatyp júrgen, qazaq boksynyń maqtanyshy, álemníń bírneshe dúrkín chempıony Nazym Qyzaıbaımen júzdesu óttí. Chempıonnyń keluí bílím ordamyz úshín mártebe, oqushylar úshín naǵyz ruhanı serpílís boldy. Zalǵa jınalǵan jas jetkínshekterdíń kózíndegí jalyn men qyzyǵushylyq – chempıonmen kezdesudíń qūndylyǵyn aıqyn kórsettí.
Kezdesu barysynda Nazym Qyzaıbaıdyń sport álemíndegí jolyn bayandaıtyn tanystyru vıdeosy kórsetíldí. Beldí sportshynyń rıngtegí erlígí, álemdík dodalardaǵy jeńísí oqushylarǵa erekshe áser qaldyrdy. Sharanyń ashylu saltanatyn «Káusar» dombyrashylar ansamblí keremet kúımen bastady. Dombyranyń kıesín sezdírgen būl áserlí sát ruhty kúıímen zalda otyrǵandardy bírden baurap aldy. Sharany odan árí kórkemdegen – mektebímízdíń myń būralǵan «Samal bı» toby sharanyń sánín keltíríp, óz ónerlerín tartu ettí.
Kezdesu sūhbat alańyna ūlasyp, oqushylar óz saualdaryn joldap, ózderín qyzyqtyrǵan sūraqtaryn qoıyp, chempıonnyń balalyq shaǵy, sportqa keluí, alǵashqy jeńísterí turaly tyń málímetter aldy. Sportshy ár sūraqqa shynaıy jauap beríp, tabysynyń syry eńbekte, tózímde, maqsattan taımauda ekenín aıtty.
Kezdesu sońynda chempıon ózíníń balalyq shaǵy Aınabūlaq shaǵyn audanynda ótkenín, osy óńírdíń júregíne jaqyn ekenín tebírene aıtty.
"Ósken jerím – men úshín erekshe sezím. Būl jerde armandar bastalyp, maqsattar qalyptasty. Búgíngí júzdesuden ózím de quat aldym», – degen sózderí zaldy jyly sezímge bóledí. Árbír jauaptyń ózegí – eńbek, tabandylyq jáne Otanǵa degen súıíspenshílík. Nazym Qyzaıbaı jas sportshylardy namysqoı, qaısar, armanshyl boluǵa shaqyrdy. Būl kezdesu jas buynǵa tek aqparat emes – jíger, sením, bıíkke ūmtylu ruhyn syılap, bolashaq chempıondardyń júregínde ot tūtatyp, jas buynǵa úlgí bolyp úlken armanǵa jeteleríne senímímíz mol."
Álemdí moıyndatqan úsh dúrkín chempıon Nazym Qyzaıbaıdyń Aınabūlaqtaı shaǵyn audanda balalyq shaǵy ótíp, tūrǵyndardyń ystyq yqylasynan quat alǵan sportshy búgíngí jeńísterín óz elíne, tuǵan jeríne arnaıtynyn ár sózínde aıtyp toqtaldy. Aınabūlaq – onyń alǵashqy qadamy, alǵashqy armanymen ūshtasqan qasıettí mekení. Sondyqtan Nazym Qyzaıbaıdyń álemdík deńgeıge deıín jetu joly – osy topyraqtan túlep ūshqan árbír jasqa jíger beretín jarqyn úlgí. Qoryta kelgende, bír ǵana sportshynyń ómír joly – tūtas bír buynǵa úlgí, ūlt ruhyn kóteretín qūndylyq ekení taǵy da dáleldendí.
Ór ruhty Nazym Qyzaıbaı syndy tūlǵalardyń ómír joly – ūrpaqqa ónege, elge maqtanysh.
