Qazaqstandyq loýkoster FlyArystan 2025 jyldyń qazan aıynda mańyzdy mejege jetip, 20-mıllıonshy jolaýshysyn tasymaldady, - dep habarlaıdy Aqshamnews.kz.
«FlyArystan» AQ prezıdenti, Rıchard Ledjer:
«Alty jyldyq jumys ishinde 20 mıllıon jolaýshyny tasymaldaý – Qazaqstan halqynyń sanymen shamalas kórsetkish. Bul – elimizdegi ishki jáne halyqaralyq áýe qatynasynyń damýyna, aımaqtyq marshrýttyq jeliniń keńeıýine jáne azamattardyń mobıldiliginiń artýyna qosqan úlesimizdiń naqty kórinisi. Aıta keterligi, osy jolaýshylardyń úshten bir bóligi bıletterdi 15 000 teńgege deıingi baǵada satyp alǵan. Sol arqyly mıllıondaǵan adam úshin alǵash ret áýe kóligimen saparlaý múmkindigine jol ashty. Bul derek adamdardy jańa kókjıekterdi ashýǵa shabyttandyrý jáne qaýipsiz de jaıly saparlaý múmkindigin usynýdaǵy bizdiń negizgi ustanymymyzdy aıqyn dáleldeıdi».
Búginde FlyArystan Qazaqstannyń 14 qalasyna turaqty reıster oryndaıdy. Halyqaralyq marshrýttyq jeli Qytaı, Ózbekstan, Qyrǵyzstan, Ázerbaıjan, Túrkıa jáne Grýzıa baǵyttaryn qamtıdy. 2025 jyldyń jańa turaqty jáne maýsymdyq baǵyttar qatarynda: Almaty – Inın, Qaraǵandy – Stambýl, Astana – Gazıpasha, Almaty – Tamchy (Ystyqkól) jáne Aqtaý – Dýbaı boldy.
Tek 2024 jylyn alǵanda, FlyArystan áýekompanıasynyń qyzmetin 4,2 mıllıonnan astam jolaýshy paıdalandy, bul Air Astana tobynyń jalpy jolaýshylar aǵynynyń 46,6% qurady.
2025 jylǵy qańtardan bastap «FlyArystan» AQ jeke paıdalanýshy sertıfıkatyn alyp, FS kody boıynsha derbes áýekompanıa retinde jumys isteı bastady. Al maýsym aıynda loýkoster Skytrax World Airline Awards boıynsha úshinshi ret qatarynan Ortalyq Azıa men TMD-daǵy úzdik búdjettik áýekompanıasy marapatyna ıe boldy.
FlyArystan týraly:
FlyArystan – Air Astana tobynyń 100% enshiles kompanıasy bolyp tabylatyn qazaqstandyq loýkoster. Ol óz qyzmetin 2019 jyldyń mamyr aıynda bastady. Áýekompanıa Almaty, Astana jáne Aqtaý qalalarynda ornalasqan bazalaryndaǵy zamanaýı A320 ushaqtarynan quralǵan áýe parkimen reıster oryndaıdy. FlyArystan keń aýqymdy marshrýttar jelisi ishki jáne halyqaralyq reısterdi, sondaı-aq charterlik baǵyttardy qamtıdy. FlyArystan 2023, 2024 jáne 2025 jyldary úsh ret Skytrax World Airline Awards tarapynan Ortalyq Azıa jáne TMD-nyń eń úzdik búdjettik áýekompanıasy dep tanyldy.