Sıfrlyq qujattardy uıaly baılanys operatorlarynyń keńselerinde qoldanýǵa bolady, dep habarlaıdy almaty-akshamy.kz QazAqparatqa silteme jasap.
Vedomstvonyń málimdeýinshe, EGov mobile mobıldi qosymshasyndaǵy «Sıfrlyq qujattar» qyzmetiniń arqasynda baılanys operatorlarynyń klıentteri qyzmetterdi alý úshin jeke basyn kýálandyratyn qujattyń túpnusqasyn usynbaýyna bolady.
«Búgingi tańda qujattyń túpnusqasyn usyna almaıtyndarǵa arnalǵan qyzmet Beeline uıaly baılanys operatorynyń qyzmet kórsetý ortalyqtarynda qoljetimdi. Bul úshin klıenttiń smartfonynda elektrondy úkimettiń qosymshasy eGov mobile bolýy kerek», - delingen habarlamada.
Mınıstrliktiń túsindirýinshe, sıfrlyq qujattardy qoldaný úshin eGov mobıldi qosymshasyn júktep alyp, ashý qajet. Sodan keıin, qyzmetter qoıyndysynda «Sıfrlyq qujattar» bólimin tańdap, avtorızasıadan ótý kerek. Qosymshaǵa bıometrıa nemese bir rettik SMS qupıa sózi arqyly qosylýǵa bolady.
Avtorızasıadan keıin ashylǵan terezede jeke kýálikti tańdap, «ruqsatty ashý» batyrmasyn basý kerek. Prosedýrany oryndaý úshin, Beeline uıaly baılanys operatorynyń menedjeri QR kodyn skanerleıdi jáne bıometrıalyq derekter arqyly klıenttiń jeke basyn kýálandyrady.
«Memlekettik qyzmetterdi kórsetýdegi yńǵaılylyq, qaýipsizdik jáne tıimdilik búginde bizdiń basymdylyq bolyp tabylady. Buǵan deıin keıbir qalalardyń bankteri men áýejaılary sıfrlyq qujattardy qabyldaı bastady. Búginde bul fýnksıa bir uıaly baılanys operatorynda qoljetimdi, alaıda mınıstrlik barlyq qaýipsizdik parametrlerine sáıkes keletin iri kompanıalar men uıaly baılanys operatorlary úshin ashyq», - dedi QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın.
Qazirgi ýaqytta sıfrlyq qujattar qyzmetinde 18 qujat tirkelgen, olardyń ishinde eń tanymaldary: jeke kýálik, júrgizýshi kýáligi, ekpe tólqujaty, PTR synaǵy jáne týý týraly kýálik.
Buǵan deıin qazaqstandyqtar sıfrlyq qujattardy áýejaı, temirjol vokzalyndaǵy vagondarda, bank pen notarıýs qyzmetterine júgingen kezinde paıdalanýǵa múmkindik aldy.