Halqymyz «Estimegen elde kóp» dep beker aıtpasa kerek. Shynymen de, jer júzinde kópshilik bile bermeıtin erekshe qubylys, týyndy ne jan-janýarlar bar. Olardyń keıbiri qoldan jasalsa, taǵy biri týa bitti tabıǵatynan daryǵan. Búginde mundaı erekshe faktilerdiń birazy Gınness rekordtar kitabynda tirkelgen. Biz osy bir erekshe kitapta jazylǵan eń erekshe rekordtardy qarap kórdik.
Basymen baǵyndyrǵan
Medeýdegi «Densaýlyq baspaldaǵynyń» shyńyna aıaqpen shyqqanda entigip qalatyndar bar. Al Gınness rekordtar kitabynda engen qytaılyq gımnast Lı Longlong birshama baspaldaqty baspen baǵyndyrǵan. Sportshy basymen tik turyp, 36 baspaldaqty birtindep basyp shyqqan. Lı Longlongtyń erekshe rekordy beınejazbaǵa túsirilgen, ony ǵalamtordan kórýge bolady.
Erekshe djostık
Kıbersport áleminde «RockyNoHands» laqap atymen tanymal Rokkı Staýtenbýrg álemdik rekordtar kitabyna erekshe djostık arqyly eń kóp jeńiske jetken adam retinde engen. Ol kompúter oıyndaryn aýyz arqyly basqaratyn djostıkpen oınaıdy. Sebebi, Rokkı 2006 jyldan beri moıynnan tómen sal bolyp qalǵan. Bul qurylǵyny oǵan baýyry ákep bergen. Erekshe djostıkke úırenip alǵan soń, Rokkı Battle Royale, PlayerUnknown Battlegrounds (PUBG) jáne Fortnite syndy oıyndardy kásibı deńgeıde oınaı bastaǵan. Búginde onyń Fortnite oıynynda 500-den astam jeńisi bar. Ol óz oıyndaryn tikeleı efırde kórsetedi.
Qaıyqqa aınalǵan asqabaq
Ótken jyly AQSH-tyń Nebraska shtatynda eń jańa ári erekshe rekordtardyń biri tirkeldi. Dýeın Hansen 60 jasqa tolǵan mereıtoıyn erekshe atap ótken. Ol salmaǵy 846 fýnt (1865 kg) bolatyn asqabaqqa otyryp Mıssýrı ózeninde 38 mıl (61 km) júzip ótken. Amerıkalyq rekordshy «Úlken Bertanyń» (qaıyqqa aınalǵan asqabaq ataýy) ishinde jalpy eseppen 11 saǵat ótkizgen. Mundaı erekshe jetistigi úshin Dýeın Hansen Gınnes rekordtar kitabynda endi.
Shymyr shynashaq
Italándyq Tasıo Gavıolı óziniń kishkentaı saýsaǵymen temirge úzilissiz 36 ret tartylǵan. Onyń rekordy 2018 jyly 7 qazan kúni resmı tirkeldi. Tasıonyń aıtýynsha, bul rekordty ornatýǵa onyń mysyǵy sebep bolǵan.
«Meniń alǵashqy rekordymdy ornatýǵa mysyǵym túrtki boldy. Ol kólik apaty kezinde bir aıaǵynan aıyrylǵan edi. Keıin onyń úsh aıaqtap aǵashqa shyqqanyn kórgende júregim aýyratyn. Sondyqtan men de onyń qurmetine bir qolmen temirge tartyla bastadym. Biraz ýaqyttan keıin qoldarym kúsheıip, shynashaqpen tartylatyn deńgeıge jettim», – deıdi rekord ıesi.
Ázirlegen Dosbol ATAJAN.