Almaty ákimdigi turǵyn úılerdiń aýlalarynan iri kólemdi qoqysty kim shyǵarýy kerek ekenin túsindirdi, dep habarlaıdy almaty-akshamy.kz
Almatyda búgingi tańda konteınerlik alańdardyń irgeles aýmaqtarynda iri kólemdi qoqystardy jınaý ózekti másele bolyp otyr. Turǵyndar eski jıhazdy, isten shyqqan turmystyq tehnıkany, santehnıkalyq buıymdardy jáne t.b. qaldyryp ketedi. Sonymen qatar, jóndeý jumystarynan keıin qurylys qaldyqtary, mysaly, plıtkalar, eski esik jaqtaýlary men kenepter, kirpishter de qoqys jáshikteriniń janynda qaldyrylady. Bul alańnyń bitelýine jáne basqa turmystyq qaldyqtardyń jınalýyna ákeledi.
Qoqys jınaıtyn mashınalar úlken kólemdegi qoqystar men qurylys qaldyqtaryn shyǵara almaıdy, óıtkeni bul tehnıkanyń presteý apparatyn isten shyǵarýy múmkin.
Esterińizge sala keteıik, «Komýnaldyq qaldyqtardy basqarý erejelerine» sáıkes jyljymaıtyn obektilerdi salýdy jáne (nemese) jóndeýdi júzege asyratyn jeke jáne zańdy tulǵalar qurylys jáne iri kólemdi qaldyqtardy (jıhaz, turmystyq tehnıka) arnaıy bólingen oryndarǵa óz betinshe áketýi qajet.
«Almaty qalasynyń aýmaǵyn abattandyrý erejelerine» sáıkes iri kólemdi qoqystardy (qaldyqtardy) shyǵarýdy iri kólemdi qoqystardy áketý sharty negizinde kásiporyndardyń, mekemelerdiń jáne jeke tulǵalardyń ózderi nemese qoqys shyǵaratyn kásiporyndar júrgizedi.
Úıde jóndeý jumystaryn júrgizetin turǵyndar, sondaı-aq iri kólemdi qoqystar paıda bolǵan kezde mamandandyrylǵan uıymdarǵa habarlasyp, aqyly tehnıkany shaqyrýy nemese qaldyqtardy polıgonǵa óz betinshe shyǵarýy qajet. Polıgondar Almaty oblysynda, İle aýdanynda jáne Qarasaı aýdanynda Aıteı aýylynda ornalasqan.
«Ákimshilik quqyq buzýshylyq týraly» QR Kodeksiniń 505-babyna sáıkes abattandyrý qaǵıdalaryn buzý jeke tulǵalarǵa – jıyrma AEK, shaǵyn kásipkerlik sýbektilerine nemese komersıalyq emes uıymdarǵa – otyz AEK, orta kásipkerlik sýbektilerine – qyryq AEK, iri kásipkerlik sýbektilerine – elý AEK mólsherinde eskertý jasaýǵa nemese aıyppul salýǵa ákep soǵady.
Almaty PD aqparaty boıynsha, osy bapqa qatysty qalany abattandyrý erejelerin buzǵany, ınfraqurylym obektilerin jáne jasyl jelekterdi qıratqany ári búldirgeni úshin 2024 jyldyń 6 aıynda 11 577 buzýshylyq tirkeldi, 32 749 200 teńgege aıyppul salyndy.
Almaty ákimdigi turǵyn úılerdiń aýlalarynan iri kólemdi qoqystardy shyǵarý máselesin retteý úshin turǵyndarǵa jáne kásipkerlerge arnaıy erejelerdi ustanýdy usynady. Qurylys qaldyqtary men eski jıhazdardy zańǵa sáıkes arnaıy bólingen oryndarǵa óz betinshe áketý qajettigin eskertedi.