Almaty oblysyndaǵy respýblıkalyq olımpıadalyq daıarlyq bazasynda Qazaqstan ulttyq quramasyn XXXIII jazǵy Olımpıa oıyndaryna resmı shyǵaryp salý rásimi ótti, dep habarlaıdy almaty-akshamy.kz.
Tórtjyldyqtyń basty dodasy 26 shilde men 11 tamyz aralyǵynda Parıj qalasynda ótedi. Fransıa astanasynda Qazaqstan quramasy sapynan 80 sportshy sporttyń 25 túrinen baq synap, 81 medal jıyntyǵyna talasady. Aıta ketý kerek, Qazaqstan Táýelsizdik jyldarynan beri osymen segizinshi márte jazǵy Olımpıadaǵa qatyspaq. Resmı is-sharada Ermek Marjyqpaev sportshylar jáne jattyqtyrýshylar quramymen áńgimelesip, aldaǵy jarystarǵa sáttilik tiledi. Mınıstr bul oqıǵanyń elimiz úshin erekshe mańyzǵa ıe ekenin atap ótti.
«Sizderdiń aldyńyzda elimizdi Parıj Olımpıadasynda tanystyrý, el namysyn abyroımen qorǵaý sıaqty mańyzdy ári óte jaýapty mindet tur. Sizderdiń chempıondyq minezińiz, tabandylyǵyńyz, jeńiske degen erik-jigerińiz, osy kúnge deıin jıǵan tájirıbelerińiz, jattyqtyrýshylardyń, dárigerlerdiń, massaj jasaýshylardyń qajyrly eńbeginiń arqasynda úlken nátıjege jetetinimizge senimdimin. Táýelsizdik jyldarynda Qazaqstan jazǵy jáne qysqy Olımpıa oıyndarynyń 79 júldegerin, onyń ishinde 15 Olımpıada chempıonyn tárbıelep shyǵardy. Olımpıadadaǵy jetistikter – búkil eldiń álemdegi ımıji, memlekettiń ál-aýqatynyń kórsetkishi, eń bastysy, bul – sizderdiń kópjyldyq jáne qajyrly eńbekterińizdiń nátıjesi!», - dedi Ermek Marjyqpaev.
Aıta keteıik, Qazaqstan quramasynyń sportshylary bıyl alǵash ret Olımpıada baǵdarlamasyna engen breıkıng jáne badmınton sıaqty sport túrlerinen óner kórsetedi. Breıkıngten el namysyn Ámir Zakırov qorǵasa, badmınton saıysynda Dmıtrıı Panarın baq synaıdy. Olımpıa oıyndarynyń ashylý saltanaty 26 shildede Parıjdegi Sena ózeninde ótedi. Jarysqa 205 elden 10 myńnan astam sportshy qatysady. Olar 32 sport túrinen 329 medal jıyntyǵyn sarapqa salady.